Jeńiske – 80 jyl: bes óńirde soǵys ardagerlerine tólem jasaldy

ASTANA. KAZINFORM — Úkimettiń qaýlysymen bıyl Jeńistiń 80 jyldyǵyna daıyndyq jáne ony merekeleý jónindegi is-sharalar jospary bekitildi. 

— Bıyl 1 sáýirdegi jaǵdaı boıynsha ekinshi dúnıejúzilik soǵysqa qatysqan ardagerlerdiń zeınetaqysyn qosa eseptegende berilgen áleýmettik tólemderdiń ortasha jıyntyq mólsheri 263 000 teńge. Al ekinshi dúnıejúzilik soǵys kezinde jaraqat alǵan, jarymjan bolǵan, mertikken nemese dert saldarynan múgedek bolǵan ardagerler úshin — 280 000 teńge. 2020 jyly Jeńistiń 75 jyldyǵyn merekeleý qarsańynda qabyldanǵan «Ardagerler týraly» zańda olarǵa kórsetiletin barlyq qoldaý men kepildik bir júıege keltirilgen. Bıyl Úkimettiń qaýlysymen Jeńistiń 80 jyldyǵyna daıyndyq jáne ony merekeleý jónindegi is-sharalar jospary bekitildi. Josparda soǵys jáne tyl ardagerlerin qurmetteý, olarǵa áleýmettik qoldaý kórsetý, sonyń ishinde materıaldyq yntalandyrý sharalary kózdelgen, — dedi Eńbek jáne halyqty áleýmettik qorǵaý vıtse-mınıstri Oljas Anafın elordada ótken ardagerler keńesiniń respýblıkalyq plenýmynda.

Osy oraıda vıtse-mınıstr bıyl Jeńistiń 80 jyldyǵyna oraı soǵys ardagerlerine 5 mıllıon teńge mólsherinde birjolǵy tólem jasalatynyn málim etti.

— Búginde barlyq óńir soǵys ardagerine 5 mıllıon teńge kóleminde tólem jasaýǵa daıyn ekenderin rastady, — deıdi ol.

Ekinshi dúnıejúzilik soǵys ardagerlerine tólem jasaǵan óńirler:

— Almaty oblysy;

— Batys Qazaqstan oblysy;

— Qaraǵandy oblysy;

— Qostanaı oblysy;

— Shymkent qalasy.

— Aqmola oblysy, Jambyl oblysy jáne Astana qalasynda tólemdi sáýir aıynyń birinshi onkúndiginde jasaıdy. Qalǵan óńirler sáýir aıynyń sońyna deıin tóleıdi, — dep sendirdi Oljas Anafın.

Aıta keteıik, bıyl 1 sáýirdegi jaǵdaı boıynsha elimizde ekinshi dúnıejúzilik soǵysynyń 111 ardageri bar. 

Bıyl Jeńistiń 80 jyldyǵyna oraı el aýmaǵynda eki myńdaı is-shara ótedi. 

Sondaı-aq Jeńistiń 80 jyldyǵyna oraı elordada ótetin áskerı sherý barlyq respýblıkalyq telearna men LED ekrandardan tikeleı kórsetiledi. 

Búgin elordada «Ardagerler uıymy» respýblıkalyq qoǵamdyq birlestigi ortalyq keńesiniń III plenýmy ótti.