Kontslagerde bolǵan atyraýlyq keıýanaǵa 1 mln teńge beriledi
ATYRAÝ. KAZINFORM – Atyraýda Ekinshi dúnıejúzilik soǵys kezinde kontslager tutqynynda bolǵan keıýana turady. Jeńis kúni qarsańynda oǵan 1 mln teńge beriledi.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, Jeńis kúni qarsańynda 2 060 adamǵa birjolǵy áleýmettik kómek berý úshin 218,5 mln teńge bólingen.
«Qazir Atyraý oblysynda Ekinshi dúnıejúzilik soǵys kezinde fashıster men olardyń odaqtastary qurǵan kontslager tutqynynda bolǵan 1 adam turady. Ol – 93 jastaǵy Ekaterına Absatyrova. Oǵan Jeńis kúnine qarsańynda 1 mln teńge kóleminde áleýmettik kómek beriledi. Jeńiske úles qosyp, túrli marapatqa ıe bolǵan 21 tyl ardagerdiń árqaısysyna beriletin áleýmettik kómektiń mólsheri – 100 myń teńge. Tylda eńbek etkenimen, eshqandaı marapat almaǵan 903 ardagerge 50 myń teńgeden birjolǵy aqshalaı kómek kórsetiledi», - deıdi Azamat Mámbetov.
Onyń deregine súıensek, 1986-1987 jyldary Chernobyl atom elektr stansasyndaǵy apatty joıýǵa qatysqan 170 ardagerine 150 myń teńgeniń áleýmettik kómegi tólenedi. Sondaı-aq, basqa memleketterdiń aýmaǵyndaǵy urys qımyldaryna qatysqan 965 ardagerge de osyndaı kólemde qarjylaı kómek berý kózdelip otyr.
Eske sala ketelik, budan buryn almatylyq ardagerlerge 2 mln teńgeden beriletini habarlanǵan edi.
