«Uly Jeńis: Erlikke taǵzym, urpaqqa úlgi»: Astanada halyqaralyq sýret kórmesi ashyldy
ASTANA. KAZINFORM – Jeńistiń 80 jyldyǵyna oraı Astanadaǵy QR Qarýly kúshteriniń áskerı-tarıhı mýzeıinde «Uly Jeńis: Erlikke taǵzym, urpaqqa úlgi» atty halyqaralyq sýret kórmesi ashyldy. Kórmege Qazaqstan, Qyrǵyzstan, Reseı elderiniń maıtalman sýretshileriniń 100-ge jýyq týyndysy qoıylǵan, dep jazdy elorda ákimdiginiń resmı saıty.
QR QK Ulttyq áskerı-patrıottyq ortalyǵynyń Áskerı-tarıhı mýzeıi, Qazaqstan Sýretshiler odaǵy men Qazaqstan Sýret akademııasy, «Otanǵa syılyq» jobasy jáne «Soǵys balalary» odaǵy birlese uıymdastyrǵan kórme keleshekte Qazaqstannyń kóptegen qalasynda jalǵasyn tabatyn úlken jobanyń tusaýkeseri boldy.
– Kórmege qoıylǵan kartınalardy Qazaqstan Sýretshiler odaǵy men Qazaqstan Sýret akademııasy jınaqtaǵan. Biz mýzeı tarapynan 15 kartına qoıdyq. Negizgi maqsat – soǵystaǵy batyrlar esimin ulyqtaý, óner arqyly jastarǵa áskerı-patrıottyq tárbıe berý, mýzeı isin damytý. Bul kórme bir aıǵa jýyq ýaqyt turady, kelem deýshilerge esigimiz ashyq, kirý tegin, – deıdi QR QK Ulttyq áskerı-patrıottyq ortalyǵy Áskerı-tarıhı mýzeıiniń bastyǵy Dáýlet Qadyrov.
Kórmege qatysqany úshin sýretshiler men birqatar uıymdastyrýshylar arnaıy sertıfıkattarmen marapattaldy.
– Týyndylarǵa tek soǵys, urys dalasyndaǵy shaıqas qana emes, oǵan deıingi jáne odan keıingi aýyr jyldar, maıdannan balasyn kútken ana, aýyldaǵy jaǵdaı, tyldaǵy eńbek, jandaný sııaqty abstraktyly taqyryptar arqaý bolǵan. Bul soǵystyń búgingi árbir qazaqstandyqqa qatysy bar, kóbimizdiń atalarymyz, týystarymyz osy soǵystan oralmaı qaldy, jaraly, múgedek bolyp keldi. Sondyqtan Jeńistiń búgingi mereıtoıy qarsańynda ótkizilip jatqan halyqaralyq deńgeıdegi kórmeniń mán-maǵynasy zor, – deıdi Astana qalasy «Sýretshiler odaǵy» QB basqarma tóraǵasy, Qazaqstan Sýretshiler odaǵynyń múshesi, Kórkem Akademııa akademıgi, sýretshi-keskindemeshi Ómiráli Ismaılov.
Jıyn barysynda kelgen qonaqtarǵa elordanyń mádenıet salasy qyzmetkerleriniń áskerı-patrıottyq taqyryptaǵy ánderi de tartý etildi.
Aıta keteıik, Astanadaǵy EKSPO halyqaralyq kórme ortalyǵynda Flora Expo Astana 2025 atty halyqaralyq gúlder kórmesi ótti.