«Uly Jibek joly» týrnıri: Saǵyndyq Toǵambaı fınalǵa shyqty

ASTANA. KAZINFORM – Ázerbaıjan astanasy Baký qalasynda ótip jatqan «Uly Jibek joly» halyqaralyq týrnırinde el quramasynan Saǵyndyq Toǵambaı (92 keli) alǵashqy bolyp fınalǵa shyqty.

Qazaqstandyq bylǵary qolǵap sheberi jartylaı fınalda reseılik Ramazan Hanalıevpen qolǵap túıistirdi. Ol úsh raýndta da qarqyndy oıyn kórsetti. Al úshinshi raýndta qarsylastar ashyq aıqasqa shyqty. Tóreshilerdiń biraýyzdan sheshimimen Saǵyndyq jeńimpaz dep tanylyp, fınalǵa joldama aldy.

Endi ol fınalda álem chempıony, Olımpıada oıyndarynyń júldegeri kýbalyq Alfonso Loren Domıngespen judyryqtasady. Bul boksshy búginde Ázerbaıjan eliniń atynan synǵa túsip keledi.

Aıta ketsek, búgin el quramasynan úsh boksshy sharshy alańǵa shyqty. Shırek fınalda Baqtııar Smaǵulov (67 keli), jartylaı fınalda Bekzat Tańatar (86 keli) qarsylastaryna ese jiberdi.

Endi el quramasynan Temirtas Júsipov (48 keli), Talǵat Syrymbetov (60 keli), Darhan Dúısebaı 71 (keli) synǵa túsedi. Al el quramasynan Damır Ábdiqadyr (51 keli), Serik Temirjanov (63,5 keli), Tımýr Nurseıitov (75 keli), Qamshybek Qońqabaev (92 keliden joǵary) jarys jolyn erte aıaqtady.