Uly tulǵalarǵa til tıgizýge jol bermeıtin sharalardy kúsheıtý kerek - depýtat
ASTANA. KAZINFORM – Úkimettik deńgeıde jedeldetip Ulttyq qundylyqtar júıesine arnalǵan memlekettik Baǵdarlama ázirleý qajet. Bul týraly Májilistiń jalpy otyrysynda depýtat Janarbek Áshimjanov málim etti.
«Sońǵy kezderi qoǵamda adam balasynyń jaǵasyn ustatatyn jaǵdaılar tolastamaı tur. Ar men uıat bosaǵada qalyp, ósek pen ótirik, jádigóılik pen qatygezdik urpaq sanasyn ýlap, qoǵamdy shyrmap barady. Ókinishke qaraı, keıingi kezderi qazaq halqynyń tarıhynda óshpes iz qaldyrǵan tulǵalarǵa tas atyp, mansuqtap, baǵytynan adasyp júrgen jastarymyzdyń qatary kóbeıip barady. Jaqynda áleýmettik jelide ult ustazy – Ahmet Baıtursynulynyń synyp bólmesindegi beınesin bas salyp toqpaqtap, judyryqtap jatqan oqýshynyń áreketi janymyzdy túńildirdi. Al kúni keshe nadandyq pen topastyqtyń qıylysqan núktesinen búr jarǵan jas bala qazaq poezııasynyń taýtulǵasy Muqaǵalı Maqataevtyń arýaǵyna til tıgizip, eldiń esin ekeý, túsin tórteý qyldy. Bul keleńsiz oqıǵa búkil qoǵamnyń janyn túrshiktirdi», - dedi J. Áshimjanov Premer-Mınıstr men Bas prokýrordyń atyna joldaǵan saýalynda.
Onyń aıtýynsha, tıisti quzyrly oryndar men jaýapty memlekettik organdar tarapynan mundaı qadamdarǵa tıisti quqyqtyq baǵasy ýaqytyly berilmegen jerde, túrli áleýmettik toptar óz betinshe jazalaý sharasyna kóshedi.
«Áleýmettik jelilerde tarıhı tulǵalarǵa ǵana emes, til men dinge, ulttyń namysyna, túrli ádiletsizdikterge baılanysty óz betimen «jazalaý» sharalary az emes. Muqaǵalıǵa qatysty jaǵdaıda da ashýǵa býlyǵyp, sharasyzdyqqa ushyraǵan azamattar sondaı qadamǵa bardy. Jeke akkaýntynda adam jınap ataqqa shyǵam degen balany áke-sheshesimen aqynnyń týǵan jerine alyp baryp, keshirim suratty. Janushyrǵan qart kisiniń taý baýraıyn jańǵyrtqan janaıqaıynyń túp tamyry qaıda jatyr? Namystan jaryla jazdaǵan jurttyń bul qadamyn qoǵam ártúrli qabyldady, árıne. Alaıda, rýhanı turǵyda kez kelgen keri áreketke tıisti ýákiletti organdar tarapynan jaýap berilmegen jerde osyndaı jaǵdaılar oryn alady. El Prezıdentiniń sát saıyn «qoǵamda Zań ústemdigi jáne tártip saltanat qurý kerek!» degen sóziniń túp maǵynasy osy emes pe, aǵaıyn!», - dedi depýtat.
Onyń paıymynsha, qoǵamda rýhanı turǵydan azǵyndaǵan tobyrlyq mádenıet qatty beleń alyp barady. Munyń basty sebebi – patrıottyq sana men ulttyq tárbıede, otbasylyq qundylyqta ketip jatqan kesel-kemshilikter. Sosyn naýqanshyldyq pen jalǵan jasampazdyqtyń, memleket qazynasyn jelge ushyryp jatqan jemqorlyqtyń kesiri.
«Eldiń erteńin senip tapsyratyn urpaq qalyptastyramyz desek, úkimettik deńgeıde jedeldetip Ulttyq qundylyqtar júıesine arnalǵan memlekettik Baǵdarlama ázirleý qajet. Balabaqshalarda, mektepterde, oqý-aǵartý baǵytynda buljymas ulttyq tárbıe men patrıottyq is-qımyl sharalary júzege asyrylýy tıis. Úkimet ultymyzdyń uly tulǵalaryna til tıgizýge, qorlaýǵa jol bermeıtin sharalardy zańdyq turǵydan qolǵa alýy kerek dep sanaımyz. El maqtanyshtarynyń ar-namysyn aıaqqa taptaǵandar Zań aldynda jaýap berip, tıisti jazasyn alǵan jaǵdaıda ǵana ulttyq qundylyqtarymyzdy qasterleı alamyz», - dedi Janarbek Áshimjanov.
