Uly Mysyr mýzeıi: Týtanhamonnyń barlyq qazynasy kópshilik nazaryna usynyldy

ASTANA. KAZINFORM —  Ejelgi dúnıeniń búginge deıin aman-esen jalǵyz saqtalǵan jeti keremetiniń biri Heops pıramıdasynyń mańynan boı kótergen Uly Mysyr mýzeıi kelýshilerge óz esigin ashty. Bul týraly VVS jazdy.

500 myń sharshy metr aýmaqqa ornalasqan mýzeıdiń kólemi Lývrdan eki ese úlken. Munda 70-ten 100 myńǵa deıin eksponat qoıylǵan, onyń ishinde buryn eshqashan kórsetilmegen jas perǵaýyn Týtanhamonnyń qabirinen alynǵan qazynalar da bar.

2002 jyly jarııalanyp, 2012 jyly ashylady dep josparlanǵan mýzeı qurylysy shyǵyndardyń ósýi, saıası tolqýlar, kovıd pandemııasy jáne aımaqtyq qaqtyǵystarǵa baılanysty kóp kedergige tap boldy.

Aýqymdy jobanyń quny shamamen 1,2 mlrd dollardy qurady, bul somanyń basym bóligi Japonııanyń halyqaralyq yntymaqtastyq agenttigi (JICA) nesıeleri esebinen qarjylandyryldy.

Mýzeıdi Egıpet premer-mınıstri Mýstafa Madbýlı «álemge berilgen syı» dep atady. Ol Mysyr mádenıetiniń mańyzyn, yqpalyn aıqyndaýdy jáne qıyndyqqa tap bolǵan ekonomıkany qoldaýdy kózdeıdi.

«Ejelgi Mysyr barlyǵyn tańǵaldyrady», — deıdi Kaır ýnıversıtetiniń professory Salıma Ikram.

Mýzeıdiń ashylǵan kúni memlekettik mereke bolyp jarııalandy, oǵan ondaǵan álem kóshbasshysy shaqyryldy.

Týtanhamon adamdardyń júregin 1922 jyly brıtandyq mysyrtanýshy Govard Karter onyń qabirin Patshalar alqabynda alǵash ashqaly beri baýrap keledi.

Endi, álemniń túrli qalalarynda ondaǵan jyldar boıy kórmege qoıylǵannan keıin, onyń altyn maskasy, taǵy jáne onymen birge jerlengen 5 myńnan astam qazyna (olardyń kópshiligi eshqashan kópshilikke kórsetilmegen) alǵash ret tolyq kóleminde usynylady.

«Týtanhamon qabirinen tabylǵan barlyq jádigerdi bir jerde jınaý — bul shynymen keremet áserli boldy», — deıdi professor Ikram.

Eske sala ketsek, buǵan deıin Mysyrda 20 jyl boıy salynǵan 1 mıllıard dollarlyq mýzeı ashylǵaly jatqanyn jazǵanbyz.