«Uly dala joryǵy» marafon-báıgesi SQO-daǵy Botaı qonysynan bastalady
PETROPAVL. KAZINFORM – Qazaqstanda V Dúnıejúzilik kóshpendiler oıyndary qarsańynda 3-7 qyrkúıek aralyǵynda alǵash ret «Uly dala joryǵy» halyqaralyq marafon-báıgesi ótedi. Bul jarys Soltústik Qazaqstan oblysynan bastaý almaq.
Marafon-báıge 5 myń jyldan astam buryn adam balasy jylqy malyn alǵash ret qolǵa úıretken Botaı qonysynda 3 qyrkúıekte bastalady.
Ulttyq sport qaýymdastyǵy baspasóz qyzmetiniń málimetinshe, sporttyq is-sharaǵa 10-nan astam elden komandalar qatysady dep josparlanǵan. Onyń ishinde Iran, Túrkııa, Majarstan, Qyrǵyzstan, Ońtústik Afrıka Respýblıkasy, Reseı Federatsııasy jáne t.b. elderdiń shabandozdary bar.
Qyrǵyzstan quramasy «Uly dala joryǵyna» qatysatyn eń úzdik attardy irikteý maqsatynda kópkúndik at sporty marafonyn ótkizdi.
«Qazaqstanda ótetin kópkúndik at jarysyna daıyndyq aıasynda 300 shaqyrymdyq qashyqtyqqa «Kochmondor jýrýshý» irikteý marafony ótti. Barlyq komandaǵa sáttilik jáne jeńimpazdardyń kóp bolýyna tilektespin. Eń tózimdi jáne jyldam sáıgúlikter jeńiske jetip, tuǵyrdan kórinetinine senimdimin», - dedi Qyrǵyzstan at sporty federatsııasynyń vıtse-prezıdenti Manas Sultanov.
«Uly dala joryǵyna» Kabardın-Balqar Respýblıkasynyń quramasy da qatysýǵa daıyndyqty bastady. «AMD Kavkaz» at sporty klýbynyń negizin qalaýshy Ahed Mahov qazaqstandyq at jarysyna qatysýǵa shaqyrtý alǵanyn aıtty.
«Marafon-báıgeniń búkil adamzat úshin kıeli meken sanalatyn Botaı qonysynan bastalýy erekshe mańyzdy. Bizdiń komanda ańyzdar men tarıhı jádigerlerge toly Botaı jerine barýǵa erekshe yntaly. Olaı bolsa, kút bizdi, Qazaqstan!», - dep atap ótti A.Mahov.
At jarysy 7 qyrkúıekte Astanada aıaqtalady. Marafon-báıgeniń jeńimpazdary 8 qyrkúıekte ótetin V Dúnıejúzilik kóshpendiler oıyndarynyń ashylý saltanatyna qatysady.
Buǵan deıin Astana aldaǵy Dúnıejúzilik kóshpendiler oıyndaryna qalaı bezendiriletindigin jazǵan edik.
