«Uly dala joryǵy»: Astanada biregeı at marafony týraly fılmniń tusaýkeseri ótti
ASTANA. KAZINFORM – Astanada «Uly dala joryǵy» at marafon-báıgesi týraly derekti fılmniń tusaýkeser kórsetilimi ótti. Bul marafon 2022 jyldan bastap jyl saıyn «AMANAT» partııasynyń, Týrızm jáne sport mınıstrliginiń qoldaýymen ótkizilip keledi. Uıymdastyrýshylar – QR Ulttyq sport qaýymdastyǵy men onyń quramyna kiretin «JORYQ» at sporty federatsııasy.
Fılmde 2023 jyly ótken «Uly dala joryǵy» marafony týraly baıandalady. Osy joryqqa qatysýshylar Astanadan Túrkistanǵa deıin 1300 shaqyrym jol júrip ótken edi. Marafon 14 kezeńge bólinip, oǵan elimizdiń 19 óńirinen bir komandadan qatysty.
Ekinshi marafonnyń qorytyndysy boıynsha 1300 shaqyrym joldy 93 saǵat 47 mınýt 43 sekýndta júrip ótken Jetisý oblysynyń komandasy absolıýtti chempıon atandy. Sonymen qatar, Mańǵystaý oblysynyń shabandozy Maǵjan Abdoluly 50 shaqyrymdy 1 saǵat 33 mınýtta júrip ótip, álemdik rekord ornatty.
«AMANAT» partııasynyń Atqarýshy hatshysy Dáýlet Káribek teńdesi joq «Uly dala joryǵy» marafon-báıgesi az ýaqyttyń ishinde halqymyzdyń súıikti jarysyna, kózaıymyna aınalǵanyn atap ótti.
«Memleket basshysynyń qoldaýymen bastalǵan «Uly dala joryǵy» báıgesi ulttyq sporttyń damýyna ǵana emes, ulttyq bolmysymyz ben tarıhymyzdy tanýǵa, ulttyq rýhtyń oıanýyna zor qozǵaý salyp otyr. Báıge-marafonǵa «AMANAT» partııasynyń tóraǵasy Erlan Jaqanuly Qoshanov ta únemi qoldaý kórsetip keledi. Biz de árdaıym osy ıgi sharanyń basy-qasynda bola beremiz. «Uly dala joryǵynan» keıin qoǵamda, ásirese jastardyń arasynda jylqyǵa, ulttyq sportqa degen qyzyǵýshylyqtyń eselep artqanyn kórip otyrmyz. Qazirgi ýaqytta jylqy ulttyq brendimizge aınaldy deýge bolady. Sondyqtan, búgingi derekti fılmdi bolashaqta jylqy týraly túsiriletin óner týyndylarynyń, kórkem fılmderdiń izashary dep bilemin», - dedi Dáýlet Káribek.
Kınokartınada shabandozdardyń jarysqa daıyndyǵy, olardyń qıyndyqtardy qalaı jeńgeni jáne jeńiske degen umtylysy kórsetiledi. Fılm qazaq halqynyń ótken kóshpeli ómir salty men qazirgi Qazaqstannyń keleshek kókjıegin biriktire otyryp, ulttyq rýhty jańǵyrtady.
Fılmde at marafonyna qatysýshylar sapar barysynda basynan ótken oqıǵalary týraly áńgimelep, shynaıy emotsııasymen bólisedi. Olar Uly dala tósin kókteı ótip, kóshpendilerdiń shynaıy álemine enýge múmkindik alǵandaryn aıtady.
«Biz osy biregeı jobany qatarynan úshinshi jyl ótkizgeli otyrmyz. «Uly dala joryǵy» kúzde elimizde ótetin 5-shi Dúnıejúzilik kóshpendiler oıyndarynyń baǵdarlamasyna engizildi. ıAǵnı, joryq halyqaralyq deńgeıge kóterildi. Osy jobanyń arqasynda elimizde ulttyq sport jáne at sporty óneri damı túsedi dep úmittenemiz», - dedi QR Ulttyq sport qaýymdastyǵynyń prezıdenti Islambek Saljanov.
Derekti fılmniń tusaýkeserine kelgen qonaqtardyń qatarynda ótken jyly osy marafon-báıgege qatysýshylar, sport salasynyń ókilderi, Parlament depýtattary, qoǵam qaıratkerleri, sheteldik dıplomatııalyq korpýs ókilderi jáne t.b. boldy. Aıta keteıik, osy jeksenbide Pavlodar-Astana baǵyty boıynsha úshinshi «Uly dala joryǵy» marafon-báıgesi bastalady.
«Uly dala joryǵy» derekti fılmin «Black&White» kompanııasy túsirdi. Jobanyń seriktesteri – «Samuryq-Qazyna» AQ jáne «Sport Qory» sportty qoldaý qory.
Eske sala keteıik, Respýblıkalyq «JORYQ» federatsııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge báıge, kókpar, teńge ilý, aýdaryspaq, jamby atý, qusbegilik, sadaq atý, asyq atý jáne t.b. federatsııalar bar. QR Ulttyq sport qaýymdastyǵyn belgili kásipker, metsenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.
