«Uly dala oıyndary» otbasylyq estafetasy ótti
ASTANA. KAZINFORM — Jarys Naýryznama onkúndiginiń Ulttyq sport kúnine oraı uıymdastyryldy. Astana qalasy ákimdiginiń Sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaıdyń sózinshe, mundaı otbasylyq estafeta ekinshi jyl qatarynan ótkizilip otyr.
— Bıylǵy baıqaýdyń ózindik ereksheligi bar. Memleket basshysy 2026 jyldy Tsıfrlandyrý jáne jasandy ıntellekt jyly dep jarııalaǵandyqtan, biz de is-sharada jasandy ıntellektini qoldandyq. Qatysýshylardyń kórsetkishin, upaıyn, qansha kalorııa energııa jumsaǵanyn JI eseptedi, — deıdi Erjigit Óserbaı.
Jarysqa árqaısysynyń 15 múshesi bar 9 komanda qatysty. Bes otbasy bir komandaǵa birikti (5 áke, 5 ana jáne 8-10 jas aralyǵyndaǵy 5 bala).
Aıta keteıik sporttyq is-sharada ákeler sadaq atý, qoshqar kóterý, narqudyq, láńgi tebý jáne «tosyn syıy bar sandyq» baıqaýlarynda kúsh synasty. Analar shalquımaq estafetasy, labırınt, han arqan, bes asyq, úlken qasyq asyq bólimderinde synǵa tústi. Al balalar asyq atyp, arqan tartysyp, kókpar oınap, asyq taýyp jáne qappen sekirip jarysty.
— Mundaı estafetanyń mańyzy zor. Birinshiden, ulttyq sport túrleri men salt-dástúrdi dáripteıdi. Ekinshiden, turǵyndardy, ásirese, balalardy salaýatty ómir saltyna baýlıdy. Otbasylyq qundylyqtardy nasıhattap, yntymaq-birlikti de nyǵaıtady. Ózim áıelim jáne qyzymmen qatystym. Jarys qyzyqty ótti, — deıdi qatysýshy Ermek Jandarbaev.
Estafeta qorytyndysynda jeńimpazdar men qatysýshylarǵa syılyqtar tabystaldy.
Eske salaıyq buǵan deıin Naýryznama onkúndigi aıasynda 747 sporttyq is-shara ótetinin jazǵanbyz.