«Uly dala oıyndary»: Almatyda ulttyq sport ulyqtaldy
ALMATY. KAZINFORM – Almatyda V Dúnıejúzilik kóshpendiler oıyndary aıasynda «Uly dala oıyndary» ulttyq sport túrleriniń festıvali ótip jatyr.
Festıval aıasynda «Almaty ıppodromynda» kókpar, aýdaryspaq, teńge ilý, jamby atý syndy ulttyq oıyndardan saıystar jáne alaman báıge uıymdastyryldy.
– Búgin «Uly dala oıyndary» festıvali ótip jatyr. Maqsatymyz – ulttyq sportty nasıhattap, onyń damýyna úles qosý. Qazir 2 myńǵa jýyq adam keldi. Alaman báıge kezinde odan da kóbeıedi dep oılaımyz. Alaman báıgeniń júlde qory – 3 000 000, qunan báıgeniń júlde qory – 2 000 000 teńge. Qazir alaman báıgege 50 sáıgúlik, qunan báıgege 30 sáıgúlik qatysady, - dedi festıval uıymdastyrýshysy Baýyrjan Talǵatuly.
Sondaı-aq is-sharaǵa kelgen qala turǵyndary men qonaqtary asyq atý, toǵyzqumalaq, gir kóterý, qol kúrestirýden sheberlik sabaqtaryna qatysýǵa múmkindik aldy.
– Almaty oblysy Aqshı aýylynda Usta Dárkenbaı atyndaǵy qolóner mýzeıi bar. Ózim qolónershimin, eki shákirtimdi ertip búgingi festıvalge ónerimizdi pash etýge keldik. Mýzeı janynda sheberhana bar. Sol sheberhanada qazaq halqynyń qolóneriniń barlyq túrimen aınalysamyz. Osy jumysymnyń arqasynda sheteldik kórmelerde boldyq. Sonda qazaq qolóneriniń irgesi bıik turady dep aıta alamyn. Sebebi aǵash, temir, teri, tas jáne maldan alynatyn jún, múıiz, súıek materıaldardyń barlyǵyn qazaq qolóneri qamtıdy. Altyn, kúmis jáne ózge de paıdaly qazbalar qazaq jerinde kóp bolǵandyqtan, halqymyzdyń zergerlik, ustalyq óner de jaqsy damyǵan, - dedi qolónershi, Usta Dárkenbaı atyndaǵy qolóner mýzeıiniń dırektory Dáýlet Dárkenbaıuly.
Festıval kezinde túıe ústinde jamby atyp, qyz qýýǵa qatysqan Arýjan Amankeldiqyzy jarystyń ulttyq oıyndardyń ereksheligi týraly pikir bildirdi.
– 2023 jyldyń qarasha aıynda túıemen jamby atyp Qazaqstannyń rekordtar kitabyna endik. Túıelerdi ózimiz arnaıy úırettik. At ústinde jamby atýmen túıe ústindegi ónerdi salystyrsaq, tek jyldamdyq jaǵynan aıyrmashylyq bar. Jylqyda jyldamyraq, al túıede baıaý. Jalpy sadaq atqan kezde qoldy durys qoıý kerek. Sonymen qatar tez oqtap, tez atyp úırený kerek. Sebebi biz kózdep emes, qol mergendikke salyp atamyz, - dedi Arýjan Amankeldiqyzy.
Al, at ústinde oınap, halyq aldynda óner kórsetken taǵy bir qyz – Dıana Sultanǵazıeva boldy. Ol at sportyna 20 jasynda kelgenin aıtady.
– 20 jasymda alǵash ret at sportyna keldim. Jasym 22-de. Biraz tájirıbe jınaǵannan keıin «Top jarǵan» ulttyq óner ortalyǵyna qosyldym. At ústinde óner kórsetý úshin ony baǵyndyryp, óz minezińdi kórsetý qajet. Eger adam álsiz bolsa, at ony sezip, baǵynbaı ketedi, - dedi Dıana Sultanǵazıeva.
