Úlgili júrgizýshi: qaraǵandylyq áıel 30 jylda birde-bir ret jol erejesin buzbaǵan

ASTANA. KAZINFORM — Qaraǵandyda áıel júrgizýshi 30 jyl boıy jol qozǵalysy erejelerin birde-bir ret buzbaǵan. Bul týraly oblystyq Polıtsııa departamenti habarlady.

Qaraǵandy oblysynda jol qozǵalysy mádenıetin arttyrý jáne jol-kólik oqıǵalarynyń aldyn alýǵa baǵyttalǵan «Úlgili júrgizýshi» aktsııasy jalǵasyp jatyr. Jol-patrýldik polıtsııa qyzmetkerleri JQE-ni buljytpaı oryndaıtyn avtokólik júrgizýshilerin toqtatyp, olarǵa alǵys bildirip jatyr.

Osyndaı júrgizýshilerdiń biri — 30 jylǵa jýyq eńbek ótili bar Svetlana Shvachkına. Osy ýaqyt aralyǵynda ol birde-bir ret ákimshilik jaýapkershilikke tartylmaǵan jáne jol-kólik oqıǵasyna ushyramaǵan.

— Men avtokólikti shamamen 30 jyldan beri júrgizip kelemin jáne osy ýaqyttyń ishinde birde-bir ret ereje buzǵan emespin. Júrgizý men úshin qajettilikke aınaldy, al búginde óz bilimimdi balalarmen bólisip júrmin. № 95 gımnazııada «Sırena» atty jas jol ınspektorlary úıirmesin basqaramyn, onda oqýshylarǵa jol qaýipsizdiginiń negizderin úıretemin. Jolda durys minez-qulyq mádenıetin qalyptastyrýdy erte jastan bastaý qajet dep sanaımyn, — dedi Svetlana Shvachkına.

Polıtsııa málimetinshe, aktsııa aıasynda ereje buzbaǵan júzge jýyq júrgizýshige alǵys hat pen estelik syılyq tabystalǵan.

— Bul is-shara «Qaýipsiz jol» atty respýblıkalyq aktsııa sheńberinde ótkizilip jatyr. Basty maqsatymyz — jol-kólik oqıǵalarynyń aldyn alý jáne júrgizýshiler arasynda erejelerdi saqtaý mádenıetin nasıhattaý, — deıdi ákimshilik polıtsııa basqarmasynyń aǵa ınspektory Tatıana Malınovskaıa.

Kezdesý sońynda Svetlana Shvachkına jol qozǵalysyna qatysýshylarǵa úndeý jasady.

— Barlyq júrgizýshilerdi erejelerdi saqtaýǵa, jyldamdyqty asyrmaýǵa jáne qarsy jolaqqa shyqpaýǵa shaqyramyn. Joldaǵy qaýipsizdik árqaısymyzǵa baılanysty, — dedi ol.

Eske sala keteıik, Qaraǵandy oblysyndaǵy trassalarda eń qaýipti jeti ýchaske anyqtaldy. 

Oǵan deıin atalǵan oblysta quqyq buzýshylyqtardyń aldyn alatyn QR-kod jobasy iske qosylǵanyn jazdyq.