Úlestik qurylystaǵy problemaly nysandar qashan tolyq aıaqtalady

ASTANA. KAZINFORM — Elimizde úlestik qurylys boıynsha problemaly nysandar qaı qalalarda kóp kezdesip jatyr? Bul suraqqa QR Ónerkásip jáne qurylys mınıstrligi jaýap berdi.

— Turǵyn úı qurylysyna úlestik qatysý salasyndaǵy problemaly obektiler 11 óńirde tirkeldi. Atap aıtqanda, bul tizimde Aqtóbe, Mańǵystaý, Atyraý, Aqmola, Shyǵys Qazaqstan, Almaty, Abaı, Qaraǵandy, Pavlodar, Soltústik Qazaqstan oblystary men Almaty qalasy bar, — delingen mınıstrliktiń Kazinform agenttigine bergen jaýabynda.

Bul turǵyda Qazaqstan Prezıdentiniń saılaýaldy baǵdarlamasynda úlestik qatysýy bar barlyq problemaly úılerdiń qurylysyn aıaqtaý boıynsha naqty tapsyrma berildi. 

— Tapsyrma aıasynda óńir ákimderimen problemaly nysandardy aıaqtaý boıynsha 2026 jyldyń sońyna deıin Jol kartasy bekitildi. Bul baǵyttaǵy jumystar óńir ákimdikterimen birlese otyryp jalǵasyp jatyr, — dep atalyp ótken vedomstvo aqparatynda.

Eske salsaq, bıyl maýsym aıynda senator Súıindik Aldashev búgin Senat maquldaǵan zań aıasynda úleskerlerdi qorǵaýdyń jańa tetikterine qatysty túsinik berdi. 

Máselen, úı satyp alǵysy keletin adam qolma qol aqshasyn bankke aparyp salady, al bankten ary qaraı iske asyrylatyn tranzaktsııa kezinde qurylys kompanııasyna tólengen qarajat anyq kórinip turady.

Osy oraıda ol turǵyn úı satyp alǵysy keletin kez kelgen adam qarajatyn tek bank arqyly tóleıtinin, ıaǵnı qurylys kompanııasyna tikeleı qolma qol aqsha salmaıtynyn naqtylady.

Sonymen qatar depýtat salatyn kópqabatty turǵyn úıde jyljymaıtyn múlik satyp alýǵa ıpotekaǵa tyıym salý normasyn túsindirdi.

— Endi qurylys bastalmaı turyp, bank ıpoteka bermeıdi. Aldymen, turǵyn úıdiń zańdy salynýy tekseriledi. Bul qadamdar úlesker aldanyp qalmaýy úshin jasalyp otyr, — dedi senator.

Buǵan deıin Astanada úleskerler 4 mlrd teńge quıǵan turǵyn úı súrilgenin jazǵanbyz.