Úlestik qurylysta qandaı zańnamalyq ózgerister boldy
ASTANA. KAZINFORM – Úleskerlerdiń quqyǵyn qorǵaýǵa jáne naryqtyq úlestik qurylysty damytý úshin zańnamalyq ózgerister qabyldanǵan. Atap aıtqanda, salynyp jatqan turǵyn úı boıynsha barlyq mámile «Qaztizilim» aqparattyq júıesinde mindetti túrde tirkeletin boldy jáne qolma-qol aqshasyz esep-aıyrysýǵa aýystyryldy. Bul týraly holdıngtiń basqarma tóraǵasynyń birinshi orynbasary Bolat Aıdapkelov aıtty.
– Qurylys salýshylar úshin kirý krıterııleri tómendetildi, biraq salynyp jatqan turǵyn úıdiń monıtorıngi men sapasy boıynsha talaptar kúsheıtildi. Jumys tájirıbesi boıynsha talaptar 3 jyldan 2 jylǵa deıin; aýdany boıynsha Astana, Almaty, Shymkent qalalarynda 18 myń sharshy metrden 10 myń sharshy metrge deıin; óńirlerde 9 myń sharshy metrden 5 myń sharshy metrge deıin tómendetildi, – dedi B.Aıdapkelov Úkimettiń búgingi otyrysynda.
Ekinshi deńgeıdegi bankterdiń quraldaryn paıdalaný múmkindikteri de keńeıtildi. Endi qurylys salýshy 1 shottyń ornyna 3 shot ashýǵa quqyly. Ekinshi deńgeıli bankterdiń kredıttik qarajatyn úlestik aqshamen aralastyrý quqyǵy berildi.
– Buryn úlestik qurylys zańnamasyn aınalyp ótip, belsendi qoldanylǵan ártúrli aldyn ala brondaý sharttaryn jasasýǵa tyıym salyndy. Úlestik qurylys tetikteri kóppáterli turǵyn úıge ǵana emes, az qabatty, kommertsııalyq jeke turǵyn úıler keshenine de, sondaı-aq apatty jáne eski turǵyn úılerdi jańartý jobalaryn iske asyrýǵa da qoldanylatyn bolady, – dedi holdıng ókili.
Sonymen birge, azamattardy habardar etý maqsatynda «Qaztizilim» aqparattyq júıesi jumys isteıdi. Onda úleskerlerdiń qarajatyn tartýǵa quqyǵy bar jáne quqyǵy joq salynyp jatqan obektiler týraly aqparat ashyq ornalastyrylǵan.
– Búgingi tańda júıede 1,3 myń salynyp jatqan úlestik qurylys nysany, 170 qurylys salýshy jáne 200 myńnan astam úlestik qatysý sharttary tirkelgen. Úleskerler men paıdalanýshylardyń biryńǵaı tizilimi júrgiziledi. Salynyp jatqan turǵyn úıdi satyp alý mámileleriniń zańdylyǵy rastalyp, «qosarlaı» satýdyń aldyn alady, – dedi B.Aıdapkelov.
2026 jylǵy qańtardan bastap úlestik qatysý týraly tirkelgen sharttar boıynsha qolma-qol aqshasyz tólemderdi tekserý servısi iske qosyldy. Bul úleskerler men qurylys salýshylar arasyndaǵy esep-aıyrysýdyń ashyqtyǵyn qamtamasyz etedi. Qarajattyń nysanaly paıdalanylýyn baqylaýdy kúsheıtedi jáne turǵyn úı salý kezinde aqshany zańsyz tartý táýekelderin azaıtady. Qazirgi ýaqytta servıske 10 ekinshi deńgeıli bank qosylǵan.
Yńǵaıly bolý úshin eGov Mobile jáne kommertsııalyq bankterdiń qosymshalarynda úlestik qurylys obektilerin tekserý fýnktsıonaly iske qosyldy. Búginde osy qyzmetti 5 mln astam adam paıdalandy.
Aıta keteıik, bıyl Otbasy bank 70 myń salymshyǵa 1,6 trln teńge jeńildetilgen ıpotekalyq qaryz beredi.