Úlestik qurylysqa qatysýshylar óz úıine ketetin shyǵyndy, úıiniń túpki baǵasyn aldyn ala bilýi tıis - S. Nokın
ASTANA. Qańtardyń 25-i. QazAqparat /Qanat Mámetqazyuly/ - Úlestik qurylysqa qatysýshy azamattar óz úıine ketetin shyǵyndy, úıiniń túpki baǵasy qandaı bolatynyn aldyn ala bilýi tıis.
Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.
«Turǵyn úı qurylysy týraly jańa redaktsııadaǵy zańǵa sáıkes, úlestik qurylys boıynsha klıentterge saraptama qorytyndysy shyǵarylǵan jobalyq-smetalyq qujatty usyný mindetti túrde talap etiledi. Jalpy, búgingi kúni úlestik qurylysqa qatysatyn turǵyn úı baǵasy men satyp alynatyn turǵyn úıdiń baǵasynda aıtarlyqtaı aıyrmashylyq bolmaı otyrǵanyn baıqaýǵa bolady. Máselen, biz negizinen Astana men Almaty qalalaryndaǵy turǵyn úı qurylysy baǵalaryn salystyryp qaradyq. Bunda úlestik jáne kommertsııalyq turǵyn úı baǵasy shamalas bolyp otyr. Teksere kelsek, klıentterdi arbaý úshin úlestik qatysýda kompanııalar arzan baǵany jarııalaǵan sekildi bolady, biraq túptiń túbinde olardyń quny naryqtaǵy qunmen birdeı bop shyǵady», dedi S. Nokın.
Onyń aıtýynsha, eger klıentter ózderi satyp alatyn páterdiń árbir sharshy metriniń túpki baǵasyn, oǵan ketetin shyǵyndardyń qalaı josparlanǵanyn biletin bolsa, qurylys salýshylar úı baǵasyn negizsiz kótere almas edi. «Bunyń barlyǵy úlestik qurylys nysanyn memlekettik saraptaýdan ótkizý barysynda aıqyndalyp otyrady», dedi Agenttik tóraǵasy.
