Úlestik qurylysqa qatysý úshin neni bilgen jón
ASTANA. QazAqparat - Astana qalasynyń qalalyq ortanyń sapasyn qadaǵalaý basqarmasy ókilderi úlestik qurylysqa qatysýdyń ózekti máselelerine jaýap berdi, dep habarlaıdy Astana qalasy ákimdiginiń resmı saıty.
Turǵyn úı qurylysyna úlestik qatysý degenimiz ne?
2016 jyldyń 7 sáýirindegi QR «Turǵyn úı qurylysyna úlestik qatysý» zańyna sáıkes turǵyn úı qurylysyna qatysý kepildik qordyń kepildigin nemese ekinshi deńgeıli banktyń qatysýy ne salynatyn turǵyn úıdiń qańqasyn kótergennen keıin úleskerlerdiń qarjysyn tarta alady. Qurylys kompanııalaryna jeke azamattarǵa basqa jolmen úleskerlerdiń qarjysyn tartýǵa qatań tyıym salynady.
Turǵyn úı qurylysyna úlestik qatysý kelisimsharty qalaı jasalady?
Turǵyn úı qurylysyna úlestik qatysý týraly kelisimshart jazbasha túrde jasalady jáne jergilikti atqarýshy organynda onyń esepke alý sátinen bastap jasalǵan dep esepteledi. Ýákiletti kompanııa turǵyn úı qurylysyna úlestik qatysý maqsatynda kelisimshart jasasýǵa nıetti jeke jáne zańdy tulǵalarǵa qurylys obektisi týraly tolyq aqparat berýge mindetti. Qurylys salýshy kompanııa ýákiletti organnyń ruqsatyn alǵan soń ǵana úleskerdiń qarjysyn tarta alady.
Úlesker men qurylys salýshy kompanııanyń kelisimshart boıynsha mindetteri qandaı?
Úlesker quqyǵy:
- úlesker qurylys salýshy kompanııadaǵy kelisimshartta kórsetilgen mindettemelerdiń tıisti deńgeıde oryndalýyn talap ete alady.
- QR azamattyq zańnamasynda belgilengen tártippen turǵyn úı qurylysyna úlestik qatysý quqyǵy týraly shart talap etýge;
- qurylysqa jaýapty kompanııadan turǵyn úı qurylysyna úlestik qatysýǵa jasalǵan kelisimsharttyń talaptaryn oryndalýyn talap ete alady.
Úlesker mindetti:
- úleskerdiń turǵyn úı qurylysyna úlestik qatysý týraly sharttyń baǵasyn tóleýi shartta belgilengen merzimde tólemderdi qurylys salýshynyń jáne (nemese) ýákiletti kompanııanyń banktegi bank shotyna engizý arqyly júrgiziledi;
- kelisimshartta kórsetilgen mindetterdi oryndaý;
- ýákiletti kompanııadan turǵyn úı úlesindegi páter nemese nysandy qabyldap alý aktysy toltyrylǵannan keıin 30 kún ishinde qurylys kompanııasy tarapynan eskertpe alǵan soń úlesin berý týraly kelisimshartqa qol qoıylady;
- eger mekenjaıy nemese taǵy da basqa málimetteri ózgergen jaǵdaıda ýákiletti uıymdy 30 kún ishinde jazbasha túrde aqparat berý.
Al qurylys kompanııasy óz kezeginde nysannyń ýaqytyly aıaqtalýyn jáne sapasynyń kelisimshartta kórsetilgen talaptarǵa saı bolýyn qamtamasyz etedi.
Qurylys kompanııasy nemese jaýapty kompanııa Kepildik berý qorynyń nemese jergilikti atqarýshy organnyń úleskerlerdiń aqshasyn tartýǵa ruqsat bergeni týraly aıta otyryp turǵyn úı qurylysynyń nemese basqa da nysannyń jarnamasyn júrgize alady. Jarnamada qurylys kompanııasy jáne jaýapty ýákiletti organ týraly aqparat bolýy tıis.
Qandaı jaǵdaıda úlesker qurylys kompanııasymen kelisimshartty úze alady?
Ýákiletti kompanııa tolyq emes jáne durys emes aqparat bergen jaǵdaıda úlesker turǵyn úı qurylysyna úlestik qatysý týraly shartty jaramsyz dep taný úshin sotqa júgine alady.
