Úlestik qatysýdaǵy nysandardyń qurylysy tolyǵymen aıaqtalǵannan keıin memlekettiń jaldyq turǵyn úı qorynda 12 myńnan astam páter bolady - Ǵ.Ámrın
ASTANA. Aqpannyń 9-y. QazAqparat /Gúlmıra Álıakparova/ - «Samuryq-Qazyna» UÁQ» AQ-ǵa enshiles Jyljymaıtyn múlik qorynyń (JMQ) qarjylandyrýymen turalap qalǵan nysandardyń qurylystary tolyǵymen aıaqtalǵannan keıin, memlekettiń jalǵa berý turǵyn úı qoryna 12 myńnan astam páter ótedi.
Bul týraly búgin Astana qalasynyń ákimdiginde elordada úlestik qatysýmen salynyp jatqan nysandardy ústimizdegi jyly tolyǵymen aıaqtaýǵa arnalǵan keńesten keıin bolǵan brıfıngte JMQ-nyń basqarma bastyǵy Ǵosman Ámrın málim etti, dep habarlaıdy QazAqparat.
Ǵ.Ámrınniń atap kórsetkenindeı, 2009 jyly JMQ qarjylandyryp jatqan nysandardyń ekeýi, atap aıtqanda «Aqjaıyq» jáne «Ál-Arqa» turǵyn úı keshenderiniń qurylystary aıaqtaldy. Olardan JMQ 377 páter satyp aldy. Al 2010 jyly 10 qurylys nysanyn aıaqtaý arqyly memlekettik -jaldyq turǵyn úı qoryna taǵy 1100 páterdi satyp alý josparlanýda.
Ǵ.Ámrınniń aıtýynsha, úleskerlerdiń qatysýymen Astana jáne Almaty qalalarynda, Aqmola (Qosshy kentindegi nysandar) jáne Almaty oblystarynda salyna bastaǵan úılerdiń problemasy tolyq sheshilgennen keıin memleket ıeligine 12 myńnan astam páter ótetin bolady.
Onyń sózine qaraǵanda, bul páterlerdi jalǵa úlestirý máselesin qala ákimdigi men «Samuryq-Qazyna» UÁQ» AQ teńdeı júzege asyrmaq.
Búginde kommertsııalyq maqsatta jalǵa beriletin páterlerdiń mehanızmderi tolyǵymen ázirlendi jáne olar ústimizdegi aqpan aıynyń sońynda jarııalanatyn bolady. Onyń operatory retinde Qazaqstannyń «Turǵynúıqurylysjınaq banki» AQ belgilenip otyr. Úılerdiń ár sharshy metriniń jalǵa alý quny úıdiń ornalasqan jerine jáne onyń qurylysyna salynǵan qarajattyń somasyna baılanysty anyqtalady. Ortasha baǵa 1 myń teńge mańaıynda bolmaq. Páterlerdi jalǵa berý merzimi - 10 jyl, onyń alǵashqy 5 jylynda baspanany jekeshelendirýge, ekinshi adamǵa jalǵa berýge jáne satýǵa bolmaıdy. Sondaı-aq, «Turǵynúıqurylysjınaq bankine» jalǵa alatyn úıdiń bir aılyq tóleminiń tórt eselengen somasyn kepildikke salý qajet.
Arendalyq páterler baspanasy joq, ne turǵyn úı jaǵdaıyn jaqsartqysy kelgen tólemge qabiletti azamattarǵa berilmek.
