Úleskerlerdi qorǵaıtyn jańa zań kúshine endi
ASTANA. QazAqparat - QR Ulttyq ekonomıka mınıstrligi Ekonomıkalyq ınfraqurylymdardy damytý departamentiniń dırektory Ulan Jazylbek Astanada Ortalyq kommýnıkatsııalar qyzmetinde ótken brıfıngte "Turǵyn úı qurylysyna úlestik qatysý týraly" zańnyń jańa normalaryn túsindirip berdi.
U. Jazylbek kúshine engen zań turǵyn úı qurylysyna xalyqtyń qarajatyn tartýdyń jańa tetikterin engizýge jáne úleskerlerdiń táýekelderin barynsha azaıtýǵa baǵyttalǵandyǵyn atap ótti.
"Buryn qoldanysta bolǵan zań qoıylǵan mindetterdi oryndaǵan joq. Máselen, 2010 jyldan bastap turǵyn úı qurylysynda úlestik qatysý salasynda úleskerlerdiń qarajatyn tartýǵa tek bir ǵana lıtsenzııa berilgen. Qurylys salýshylar turǵyn úı maqsatyndaǵy nysandardyń qurylysyna úleskerlerdiń aqshasyn nysany men mazmuny retteýshilik salaǵa jatpaıtyn ózge de mámilelerdi jasaý arqyly zańnama normalarynan tys tartý múmkindigine ıe boldy. Osyǵan baılanysty turǵyn úı qurylysyna úlestik qatysý týraly jańa zańdy ázirleý shuǵyl qajettiligi týyndady", - dedi ol.
Departament basshysynyń aıtýynsha, jańa zań úleskerlerdiń qarajatyn qorǵaý tetikterin qamtyp otyr. Onyń aıasynda kepildik berý qory qurylady, úleskerlerdiń qarajaty ekinshi deńgeıli bankterde ornalastyrylyp, ol zańmen qadaǵalanady jáne ol qarjy turǵyn úı nysanynyń qańqasy salynyp bitken kezde ǵana berý sııaqty talaptar qarastyrylǵan.
Bul rette, qurylys salýshynyń turǵyn ǵımarattar qurylysy boıynsha keminde úsh jyl tájirıbesi bolý kerek jáne respýblıkalyq mańyzy bar qalalardaǵy, astanadaǵy qurylysta keminde 18 myń sharshy metr jáne óńirlerde keminde 9 myń sharshy metr salý kerek, sońǵy eki qarjy jylynda shyǵynsyz qyzmetiniń bolýy, sonymen qatar, qaryz jáne menshikti kapıtalynyń araqatynasy jetiden aspaýy tıis.
«Báıterek» UBH» AQ janynan Qazaqstan Respýblıkasynda úlestik salymdaryna kepildik berý júıesin qurý úshin 10 mlrd. teńge jarǵylyq kapıtaly bar Turǵyn úı qurylysyn kepildik berý qory qurylǵan, ol kapıtal jetimdiliginiń normatıvine sáıkes turǵyn úı obektileri qurylysyn 200 mlrd. teńgeden aspaıtyn somaǵa kepildik berýge múmkindik beretin bolady. Qordyń kepildigin alý úshin qurylys salýshysy jáne ýákiletti kompanııa belgilengen talaptarǵa saı bolý kerek", - dedi U. Jazylbek.
Kepildik berý qory, qurylys salýshysy jáne ýákiletti kompanııa arasyndaǵy kepildik sharty úleskerlerdiń aqshasyn tartýǵa negizdeme bolady.
Ýákiletti kompanııa turǵyn ǵımarat qurylysy jónindegi óz mindettemelerin oryndamaǵan jaǵdaıda kepildik berý jaǵdaı bastalady, bul jaǵdaıda Kepildik berý qory qurylysty aıaqtaýǵa jáne úleskerlerge páterlerin berýge kepildik beredi.
"Barlyq rásimderdi ótip bolǵannan keıin qurylys salýshy jáne ýákiletti kompanııa úleskerlerdiń aqshasyn tartýǵa ruqsat alý úshin jergilikti atqarýshy organǵa shaǵymdanady, sol ruqsattyń arqasynda olar úleskerlerdiń aqshasyn tartýǵa múmkindigi bar, biraq ol aqshany ekinshi deńgeıdegi banktiń sheshimi boıynsha turǵyn ǵımarattyń qańqasy turǵyzylǵannan keıin paıdalanýǵa múmkindigi bar.
Bank ınjınırıngtik kompanııa oryndaǵan jumystar kólemin rastaǵannan keıin oryndalǵan jumystardyń aktilerine sáıkes aqshanyń maqsatty paıdalanylýyna baqylaýdy júrgizedi jáne aqshany bóledi", - dep túıdi ol.
