Úleskerlerden zańsyz 5,5 mlrd teńgeden astam qarajat tartqan kompanııa basshylary sottaldy

ASTANA. KAZINFORM – Aqtaý qalasynda «Sultan», «Aqqala» jáne «Murager» kópqabatty turǵyn úıler qurylysy kezinde asa iri kólemdegi alaıaqtyq faktisi boıynsha aıyptaý úkimi shyqty, dep habarlaıdy Qarjylyq monıtorıng agenttiginiń baspasóz qyzmeti.

Atalǵan isti QMA Mańǵystaý oblysy boıynsha departamenti júrgizdi.

Tergeý barysynda «IntererStroıAqtaý» JShS basshylarynyń qurylys júrgizýge ruqsat qujattary, lıtsenzııasy jáne jobalyq-smetalyq qujattamasy bolmaǵanyna qaramastan, 590 úlestik qatysý kelisimshartyn jasasqany anyqtaldy.

Nátıjesinde úleskerlerden zańsyz túrde 5,5 mlrd teńgeden astam qarajat tartylǵan.

Sonymen qatar, qurylys jumystary talapqa saı júrgizilmegen jáne belgilengen merzimde aıaqtalmaǵan.

1,9 mlrd teńge kólemindegi qarajat jalǵan qurylys aktileri arqyly qolma-qol aqsha retinde kassadan shyǵarylyp, kompanııa basshylyǵy tarapynan ıemdelgen.

Tergeý barysynda 5 jer telimi men 47 avtokólikke tyıym salyndy.

Sot úkimimen kompanııa basshylary 3,5 jyldan 6,5 jylǵa deıin bas bostandyǵynan aıyryldy.

- Sondaı-aq, jábirlenýshilerdiń azamattyq talaptaryn óteý maqsatynda 1,1 mlrd teńge kólemindegi múlik tárkilenip, ótem retinde aýdaryǵan, - delingen habarlamada.

Osyǵan deıin Qarjylyq monıtorıng agenttigi jalǵan shetel valıýtasyn ótkizý faktileri jıilep ketkeni týraly habarlaǵan bolatyn.