Úleskerlerdi qorǵaý: Ulttyq bank tólem tártibine ózgeris ázirledi
ASTANA. KAZINFORM — Qazaqstan Ulttyq banki tólemder men aqsha aýdarymdary máseleleri boıynsha «Qazaqstan Respýblıkasy Ulttyq banki Basqarmasynyń keıbir qaýlylaryna ózgertýler men tolyqtyrýlar engizý týraly» Ulttyq banktiń basqarma qaýlysynyń jobasyn ázirledi.
Joba turǵyn úı qurylysy jáne tutynýshylardyń quqyqtaryn qorǵaý máseleleri boıynsha zańdardyń erejelerin iske asyrý maqsatynda ázirlendi.
Máselen, úlestik qatysý sharttary (ÚQSh) boıynsha barlyq tólem qolma-qol aqshasyz nysanda, onyń ishinde ýákiletti qurylys kompanııasynyń banktik shotyna bankter arqyly qolma-qol aqsha engizý jolymen júzege asyrylýǵa tıis ekeni kózdeletin Tólemder jáne tólem júıeleri týraly zańǵa tolyqtyrý engiziledi.
— Bul talap tek bastapqy naryqtaǵy mámilelerge (salynyp jatqan kóppáterli turǵyn úıdegi nemese jeke turǵyn úı keshenindegi úlesti satyp alý) qoldanylady jáne tirkelmegen ÚQSh-men baılanysty táýekelderden úleskerlerdiń quqyqtaryn qorǵaýǵa baǵyttalǵan.
Úlesker tólemdi júrgizý úshin arnaıy tólem belgileý kodyn (TBK) jáne úlestik qatysý shartynyń nómirin kórsetýi kerek. Bankter osyndaı TBK-men tólemderdi qabyldaý kezinde biryńǵaı aqparattyq júıede tirkelgen ÚQSh-nyń bar-joǵyn tekseretin bolady. Eger shart tirkelmegen bolsa, ıaǵnı ýákiletti qurylys kompanııasynyń qarajat jınaýǵa quqyǵy bolmasa, onda bank tólemdi qabyldaýdan bas tartady, — delingen Ulttyq bank habarlamasynda.
Budan basqa, tutynýshylardyń quqyqtaryn qorǵaý máseleleri boıynsha zańǵa sáıkes keltirýge baǵyttalǵan túzetýler engiziledi.
— Jobada tabıǵı nemese tehnogendik sıpattaǵy tótenshe jaǵdaı kezinde zardap shekkenderge (jeke tulǵalarǵa) tólengen aqshalaı qarajatty úshinshi tulǵalardyń óndirip alýyna tyıym salatyn jańashyldyq kózdelgen. Bul talap osyndaı tólemderdiń saqtalýyn jáne halyqtyń olardy nysanaly paıdalanýyn qamtamasyz etýge baǵyttalyp otyr. Osylaısha, bankter TJ kezinde zardap shekkenderge ótemaqy tóleýge qatysty bolsa, olardy óndirip alý týraly úshinshi tulǵalardyń talaptaryn oryndaýsyz qaldyrady, — delingen habarlamada.
Sonymen qosa, Joba quqyqtyq monıtorıng qorytyndysy boıynsha engiziletin basqa da naqtylaýshy jáne redaktsııalyq ózgeristerdi qamtıdy.
Qaýly jobasymen «Ashyq NQA» portalynda tanysýǵa bolady.
Aıta ketelik Qazaqstanda úleskerlerdi qoldaý ortalyǵy qurylatyny týraly jazǵan edik.