Úleskerlerdi qorǵaý: salynyp jatqan turǵyn úıdi tek qolma-qol aqshasyz satyp alýǵa bolady

ASTANA. KAZINFORM – Búgin Senattyń jalpy otyrysynda «Keıbir zańnamalyq aktilerge turǵyn úı qurylysyna úlestik qatysý, avtomobıl joldary jáne múgedektigi bar adamdardy tasymaldaý jónindegi qyzmetterdi kórsetý máseleleri boıynsha ózgerister engizý týraly» Zańy eki oqylymda qaralyp, maquldandy.

Zań úlestik qurylys salasyn memlekettik retteýdi kúsheıtýge, zańsyz qurylys úlesin qysqartýǵa, múgedek adamdardyń ómir súrý sapasyn jaqsartýǵa, avtojol salasynyń kadrlyq áleýetin arttyrýǵa baǵyttalǵan.

- Ónerkásip jáne qurylys mınıstrliginiń aqparatty boıynsha elimizde turǵyn-úı úlestik qurylysyn salý baǵytynda 99 úı ruqsatsyz salynǵan jáne 42 problemalyq úı bar. Osy faktorlar keıbir qurylys salýshylar azamattyq qatynastarǵa silteme jasaı otyryp, jeke tulǵalarmen ártúrli kelisimsharttar jasaıtyndyǵyna baılanysty. Bul óz kezeginde azamattardyń quqyqtary men múddelerin qorǵaýdyń tıisti deńgeıin qamtamasyz etpeý jáne nysandardy tapsyrý merzimderin keshiktirý, sapasyz qurylys pen úleskerler úshin shyǵyndar sııaqty jaǵymsyz saldarǵa ákelip otyr. Osyǵan baılanysty turǵyn úı qurylysy qyzmetiniń ashyqtyǵyn, mámilelerdiń qaýipsizdigin, úleskerlerdiń aqshasyn maqsatty paıdalanýdy qamtamasyz etýge, áleýmettik shıelenisti jáne bıýdjetke túsetin júktemeni tómendetýge baǵyttalǵan sharalardy qabyldaý maqsatynda osy zańmen tıisti negizgi novellalar kózdelgen, - dedi senator Súıindik Aldashev.

Osy oraıda turǵyn úı qurylysyna úlestik qatysý bóliginde salynyp jatqan úılerde turǵyn jáne turǵyn emes úı-jaılardy satyp alýǵa baılanysty aldyn ala sharttar jasasýǵa tyıym salý, úleskerlerdiń qarjylaryn tartýǵa ruqsatsyz jarnamaǵa tyıym salý, salynyp jatqan turǵyn úı naryǵynda úleskerlerdiń aqshasyn tartýdyń zańdylyǵy bóliginde jergilikti atqarýshy organdardyń (JAO) baqylaý júrgizýi eskerilgen. 

Munymen qosa, salynyp jatqan kóp qabatty turǵyn úıde jyljymaıtyn múlik satyp alýǵa ıpotekaǵa tyıym salýdy, sondaı-aq salynyp jatqan turǵyn úıdi tek qolma-qol aqshasyz nysanda satyp alý-satý boıynsha mámileler júrgizýdi, turǵyn úı qurylysynyń uzartý merzimin 9 aıdan 5 aıǵa deıin qysqartýdy kózdeıdi.

- Halyqtyń múddelerin qorǵaý maqsatynda azamattarǵa turǵyn úıdi qaýipsiz satyp alý týraly keńes berý, belgili bir qurylys salýshylarda JAO ruqsatynyń nemese biryńǵaı operatordyń kepildiginiń bolýy týraly aqparat berý úshin Úleskerlerdi qoldaý ortalyǵy qurylady. Sonymen qatar, az qabatty qurylysty damytý maqsatynda «Turǵyn úı qurylysyna úlestik qatysý týraly» Zańynyń retteý salasyna «jeke turǵyn úıler kesheni» uǵymy engiziledi, - dedi depýtat.

Budan bólek, bul zańda jalpyǵa ortaq paıdalanylatyn avtomobıl joldarynyń sapasyn arttyrý baǵytynda tómendegideı ózgerister eskerilgen:- merdigerler men jobalaýshylardy qosa alǵanda, salanyń barlyq qatysýshylary úshin ashyqtyqty qamtamasyz etý úshin jol-qurylys materıaldary men tehnologııalary boıynsha biryńǵaı aqparattyq júıeni engizý; - tehnıkalyq jáne avtorlyq qadaǵalaýdy júzege asyratyn adamdar «Sybaılas jemqorlyqqa qarsy is-qımyl týraly» Zańynyń sýbektilerine teńestiriledi.

- Múgedektigi bar adamdardy ınvataksıde tasymaldaý bóliginde tıisti normalar engizildi. Óńirlerde múgedektigi bar adamdardyń kóp sanyn qamtýǵa múmkindik beretin áleýmettik qyzmetter portaly arqyly ınvataksı qyzmetterin kórsetý múmkindigin keńeıtý qarastyryldy (qazirgi ýaqytta ınvataksı qyzmetterin memlekettik satyp alý arqyly jetkizýshiler kórsetedi), - dedi Súıindik Aldashev.

Eske salsaq, bıyl úleskerlerden zańsyz 5,5 mlrd teńgeden astam qarajat tartqan kompanııa basshylary sottaldy.