Úleskerler problemasynyń týyndaýyna ne túrtki

ASTANA. KAZINFORM – «Astana qalasynyń qalalyq orta sapasy jáne baqylaý basqarmasy» MM basshysy Ǵanı Tajıev elordada úleskerler problemasynyń týyndaýyna túrtki bolatyn jaıttardy atady.

- Qurylys kompanııasy turǵyn úıdi bastap salǵan kezde kúshterin durys eskermeı, jarty joldan tastap ketedi. Jalpy, olar qurylysty bastaǵanda múmkindikterin, resýrstaryn qaraýy tıis. ıAǵnı, eń aldymen uıymdastyrý jaǵynan qatelikter ketip jatady. Ekinshiden, qazirgi zańdaǵy olqylyqtardy paıdalanyp, bolashaq úleskerlerdiń qarajattaryn jınap alady da ony durys jaratpaıdy. Úshinshiden, tekserýde kemshilikter bar. Bizdiń tekserýge kúshimiz jetkiliksiz. Mysaly, olqylyq anyqtalǵanda 300 AEK (1 107 600 teńge) mólsherinde aıyppul salamyz. Olar ony tólep, qurylysty ary qaraı jalǵastyra beredi. Menińshe, osy úsh másele qıyndyq týdyryp otyr. Árıne, osy baǵytta jumys istep jatyrmyz, - dedi ol.

Onyń atap ótýinshe, elordada 16 myń problemaly úlesker boldy. Olardyń 15 600-i búginde 150 nysanda ornalasqan páterleriniń kiltin aldy. Qazirgi ýaqytta «Aqerke», «Arabı-2», «Mırnyı dom» turǵyn úı keshenderi sııaqty problemaly 7 nysan qaldy. Bul nysandardyń qurylysy jyldyń sońyna deıin tolyq aıaqtalady. Munan bólek, 24 problemaly nysan baqylaýǵa alyndy. Alaıda, olar «Elorda qurylys» kompanııasyna kirmeıdi.

- Atalǵan nysandardyń 9-yn qurylys kompanııasy birtindep bitirip jatyr. Keıbir nysanǵa baılanysty qylmystyq is qozǵalyp, qurylysshylardyń qamaýǵa alynǵany da bar. Kelesi jylǵa 6 nysan qalady, ony sońyna deıin aıaqtaımyz. Endi ýaqyttaǵy qala saıasaty - mundaı problemaly nysandardy almaý. Sebebi, úshinshi tolqyn boldy, turǵyndarǵa jaqsylap túsindirýimiz kerek. Mundaı problema týyndyrmaýymyz qajet. Oǵan qandaı shara qoldanyp jatyrmyz? Jyldyń basynda ruqsat qaǵazsyz salynyp jatqan 90 nysan boldy. Dál ony 30-ǵa deıin tómendettik, jyl sońyna deıin bitiremiz. Ruqsatsyz salynǵan úılerge turǵyndar turyp jatyr. Biraq qujattaryn ala almaı júr. Endi ruqsatsyz turǵyn úı salýǵa jol bermeımiz. Apta saıyn monıtorıng júrgiziledi. Monıtorıng barysynda ruqsatsyz salynyp jatqan turǵyn úıler anyqtalsa birden shara qoldanyp, toqtatamyz, - dedi Ǵanı Tajıev.

Aıta keteıik, buǵan deıin qala ákimi úleskerlerdiń máselesin sheshýge bıýdjetten qarajat kózdelmeıtinin jetkizgen.