Úleskerler máselesi: Almatyda 4 qurylys kompanııasyna 300 aryz túsken
ALMATY. KAZINFORM — Almatyda baspanasyn ýaqtyly ala almaǵan úleskerler máselesi ózekti bolyp tur.
Qurylys bastalmaı turyp, bolashaq páterine arzan baǵada aqsha quıýdy kózdeıtin adamdardyń kóbeıýi Almaty syndy iri megapolısterge tán zańdylyq. Adamdar jumys ne jańa múmkindikterdi izdep keletin mundaı ortalyqtarda aldymen turǵyn úı máselesin sheshkisi keledi. Alaıda naryqtaǵy baǵa qymbat bolǵandyqtan, úı alýdyń ózge joldaryn izdep, úlesker bolady. Bul sheshim keıde ózin aqtasa, keıde baspana kútken adam úshin aryz-shaǵymmen aıaqtalady.
Kazinform agenttiginiń saýalyna jaýap bergen Almaty qalasy polıtsııa departamentiniń málimetinshe, bıyl ártúrli turǵyn úı keshenderinde páter bermeý derekteri boıynsha tórt kompanııa (JShS) basshylaryna qatysty 312 adam polıtsııaǵa aryzben júgingen.
— Atalǵan faktiler boıynsha QK-niń 190-babynyń 4-bóligine (Asa iri mólsherde alaıaqtyq) sáıkes, qylmystyq ister qozǵalǵan. Qazirgi tańda qylmystyq ister Almaty qalasy polıtsııa departamentiniń tergeý basqarmasynda qaralyp jatyr. Aldaǵy ýaqytta zańǵa sáıkes protsessýaldyq sheshim qabyldanady, — dep habarlady departamentten.
Qurylys kompanııalarynyń jumysy qalaı baqylanady
Óńirlik kommýnıkatsııalar qyzmetiniń alańyndaǵy brıfıng barysynda Almaty ákiminiń orynbasary Beıbit Shahanov qalada úleskerler máselesin sheshý baǵytynda qandaı jumys istelip jatqanyn aıtqan bolatyn. Onyń sózinshe, ákimdik pen basqa da vedomstvolar árdaıym qaladaǵy qurylys kompanııalarynyń qyzmetin baqylap otyrady.
— Ókinishke qaraı, bizde qajetti qujattary joq ekenine qaramastan úleskerlerdi tartatyn jaýapsyz qurylys kompanııalary bar. Kásipker jekemenshigindegi jerde zańsyz turǵyn úı salýdy bastap ketedi de, ony belsendi túrde sata bastaıdy. Árıne, keıin qujattardy rásimdeýge tyrysady. Biraq ol múmkin bolmaıdy. Nátıjesinde adamdar aqshasyz da, pátersiz de qalady. Mundaı derekter anyqtalǵan kezde Qala qurylysyn baqylaý basqarmasy jumystardy toqtatady. Alaıda sot otyrystary keıde sozylyp ketedi, — dedi ol.
Sondaı-aq Beıbit Shahanov eń aldymen jaýapkershilik úlesker bolatyn adamdardyń ózinde ekenin atap ótti. Aıtýynsha, qurylysqa aqsha salatyn adam — onyń senimdi ári zańdy bolýyn ózi tekserýi kerek.
— Ákimdik jarnamalardy únemi baqylap otyrady. Saıtta kúmándi turǵyn úı keshenderi boıynsha aqparat jarııalaıdy. Árbir turǵyn úıdiń senimdiligin teksere alatyn «shuǵyl baılanys jelisi» bar. Biraq bireýge aqshasyn bermes buryn ony tekserýi ár adamnyń jeke jaýapkershiligi dep oılaımyn. Biz zardap shekkenderge kómektesýge daıynbyz, biraq eń aldymen bul qarajatyn ózgege bergen adamdardyń jaýapkershiligi, — dedi Beıbit Shahanov.
Zańnamadaǵy ózgeris
Bıyl 31 tamyzda elimizde turǵyn úı qurylysyna úleskerlik qatysýǵa qatysty jańa zań kúshine endi. Endi «Qazaqstan turǵyn úı kompanııasy» AQ kepildigi nemese jergilikti atqarýshy organnyń (ákimdik — red.) ruqsaty joq qurylys kompanııasyna úlesker qarjysyn tartýǵa tyıym salyndy. Sondaı-aq budan bylaı úlesker qolma-qol aqshaǵa páter satyp ala almaıdy, qarjy qurylys kompanııasyna tek ekinshi deńgeıli bankter arqyly aýdarylady.
Sonymen qatar turǵyn úıge zańsyz úlesker tartý, jarnamalaý úshin aıyppul mólsheri 7 ese ósti. «Ákimshilik quqyqbuzýshylyq týraly» QR Kodeksine zańsyz úlesker tartý jáne Biryńǵaı operatordyń ruqsatynsyz nemese kepildiginsiz jarnama taratý úshin aıyppul sanktsııalaryn 300-den 2000 AEK-ke deıin (1 179 600 teńgeden 7 864 000 teńgege deıin) ulǵaıtý jóninde túzetýler engizildi.
Eske salaıyq, buǵan deıin Almatyda satyp alýǵa usynylmaıtyn turǵyn úı keshenderiniń jańa tizimin usynǵanbyz. Onyń ishinde Alataý aýdanynda 2, Almaly aýdanynda 4, Bostandyq aýdanynda 11, Medeý aýdanynda 6, Naýryzbaı aýdany 5 turǵyn úı kesheni bar. Tolyq tizimdi osy siltemeden oqýǵa bolady.