Úleskerdiń turǵyn úıge qatysty quqyǵy qorǵaldy
ASTANA. QazAqparat - Semeı qalalyq sotynda páterdi tapsyrý kelisimshartyn bekitýdi mindetteý týraly azamattyq is qaraldy.
Talapker A.Kojataeva «Leıla» SÚ» JShS-ne qatysty aryzdanyp, 2014 jyldyń qyrkúıeginde «Trıýmf» kópfýnktsıonaldyq turǵyn úı kesheninde ornalasqan 2 bólmeli páter qurylysyna úlesker bolǵan. Qazirgi tańda «Trıýmf» turǵyn úıi eksplýatatsııaǵa berilgen, ýákiletti organda tirkelgen, alaıda 2014 jyldyń qarashasynda merdiger onyń páterine kirýine tyıym salǵan. Páteriniń kiltin tek 2016 jyldyń aqpanynda ǵana alǵan. JShS jumysshylarymen kireberis esiktiń qulpy onyń ruqsatynsyz eki márte almastyrylǵan. Qurylys mekemesi páterdi tapsyrý kelisimshartyn bekitýden bas tartqandyqtan, páterge ıelik quqyǵyn tirkete almaǵan.
«Turǵyn úı qurylysyna úleskerlik qatysý týraly» Zańnyń 17 babynyń 1 tarmaǵyna sáıkes, merdiger úleskerge turǵyzylǵan ǵımarattaǵy onyń úlesin kelisimshartta kórsetilgen merzimnen keshiktirmeı tapsyrýǵa mindetti. Turǵyn úıdegi úlesker úlesi ýákiletti kompanııamen qoldanysqa berilgen turǵyzylǵan baspanany qabyldaý aktisine qol qoıylǵannan keıin tapsyrylady.
Turǵyzylǵan baspana qoldanysqa berilgendikten qabyldaý aktisi Ádilet organdarynda tirkelse, onda múlikke ıelik quqyǵyn tirketý úshin jaýapkerdiń talapkerge páterin tapsyrýdan bas tartýǵa esh quqyǵy bolmaǵan.
Sot sheshimimen aryz talaptary qanaǵattandyryldy. Qurylys mekemesi ádilet organdarynda tirkeýde múlikti tapsyrý kelisimshartyn bekitý úshin talapkerge páterdi tapsyrý mindetteldi.
Sot sheshimi zańdy kúshine engen joq.
