Úlesker jumys ornyna tirkele alady

ASTANA. QazAqparat - Paıdalanýǵa berilmegen úıde turyp jatqan úleskerler ózderiniń jumys oryndaryna tirkeýge tura alady. Bul týraly búgin Astana qalalyq ІІD Kóshi-qon polıtsııasy basqarmasynyń bastyǵy Gúlvıra Dónenbaeva málim etti, dep habarlaıdy QazAqparat.

 «Úleskerlik qatysý boıynsha aıtarym, Zańǵa sáıkes tirkeýge turý úshin quqyq belgileıtin qujat bolýy qajet. Árıne, men bul Zańdy ózgerte almaımyn. Óıtkeni, men bul Zańdy oryndaýshymyn. Tek aıtarym, azamattardyń jumys oryndary boıynsha mekemelerde, keńselerde, sonymen birge medıtsınalyq mekemelerde tirkeýge turý quqyǵy bar. Jalpy, úleskerlik qatysý boıynsha mundaı nusqalar óte kóp», - dedi Dónenbaeva.

Aıta keteıik, 2016 jyldyń 1 jeltoqsanynda Memleket basshysy ekstremızm men terrorızmge qarsy is-qımyl jónindegi sharalardy kúsheıtýge baǵyttalǵan «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Atalǵan Zańǵa sáıkes azamattar turǵylyqty jerinde tirkeýge turýǵa mindetti.