Úlesker qurylys nysanynyń kepildigi baryn bank qosymshasy arqyly teksere alady

ASTANA. KAZINFORM – Salynyp jatqan qurylys nysanynan turǵyn úı satyp alýǵa nıetti jandar endi onda «Qazaqstan turǵyn úı kompanııasy» AQ kepildigi bar-joǵyn onlaın bile alady. Bul týraly QR ÓQM Qurylys jáne turǵyn úı kommýnaldyq sharýashylyq isteri komıteti tóraǵasy Baqytjan Júnisbekov aıtty.

— Halyqtyń qarjylyq saýattylyǵyn arttyrý maqsatynda Halyk, BTsK, Eýrazııalyq, Jusan jáne EGOV qosymshalarynda úlestik qurylystaǵy nysandardy tekserý servısi iske qosyldy. Satyp alýshylar onlaın rejımde belgili bir nysan boıynsha Biryńǵaı operatordyń kepildiginiń nemese jergilikti atqarýshy organnyń ruqsatynyń bar-joǵyn teksere alady. Bul óz kezeginde úleskerlerdiń aldanyp qalý jaǵdaılaryn jáne problemalyq nysandardyń sanyn azaıtady, – dedi ol OKQ alańyndaǵy baspasóz máslıhatynda.

Sondaı-aq spıker bul bastama problemaly úleskerler máselesin sheshýge baǵyttalǵanyn atap ótti.

— 2025 jyldyń birinshi jartyjyldyǵynyń qorytyndysy boıynsha servıspen shamamen 530 myń biregeı paıdalanýshy qoldandy. Jalpy qabyldanǵan sharalar turǵyn úı qurylysy salasyndaǵy qyzmettiń ashyqtyǵyn qamtamasyz etýge, mámilelerdiń qaýipsizdigin arttyrýǵa, úleskerlerdiń qarajatyn maqsatty paıdalanýǵa, áleýmettik shıelenisti tómendetýge jáne bıýdjetke túsetin júktemeni azaıtýǵa baǵyttalǵan, – dedi Baqytjan Júnisbekov.

Eske salsaq, 30 maýsymda Memleket basshysy «Qazaqstan Respýblıkasynyń keıbir zańnamalyq aktilerine turǵyn úı qurylysyna, avtomobıl joldaryna úlestik qatysý jáne múgedek adamdardy tasymaldaý boıynsha qyzmetter kórsetý máseleleri boıynsha ózgerister men tolyqtyrýlar engizý týraly» QR Zań qabyldandy. Jańa zań elimizde turǵyn úı qurylysyna úlestik qatysý salasyndaǵy syn-qaterlerdi azaıtyp, qurylys salýshylardyń josyqsyz tájirıbesin retteýge baǵyttalǵan normalar bar.

Sondaı-aq jańa zańǵa saı, endi qurylys kompanııasynan qolma-qol aqshaǵa páter nemese turǵyn emes jaı satyp alýǵa tyıym salynady. Ol turǵyn úı alypsatarlyǵynyń aldyn alý úshin jasalyp jatyr.