Úles 65%: Túrkııa soqqy jasaıtyn dron eksportynda álemde kósh bastap tur

ASTANA. KAZINFORM — Túrkııa soqqy jasaıtyn ushqyshsyz ushý apparattaryn eksporttaý boıynsha álemdik naryqtyń 65 paıyzyn ıelenip otyr, dep habarlaıdy AZERTADJ.

Túrkııa soqqy jasaıtyn ushqyshsyz ushý apparattaryn (BPLA) eksporttaý boıynsha álemdik naryqtyń 65 paıyzyn alyp otyr. Tek Baykar kompanııasynyń ózi BPLA-ny álemniń 37 eline jetkizedi.

Bul týraly Baykar kompanııasy dırektorlar keńesiniń tóraǵasy Selchýk Baıraktar jýrnalısterge málimdedi. Onyń aıtýynsha, túrik óndirisindegi ushqyshsyz apparattar — zamanaýı tehnologııa men tıimdi baǵanyń úılesimi.

— Biz BPLA-larǵa ornatýǵa bolatyn oq-dárilerdiń keń aýqymyn usynamyz, bul bizdiń ónimdi ózgelerden erekshe etedi, — dedi ol, Túrkııanyń qorǵanys ónerkásibiniń jetistikterine nazar aýdara otyryp.

Selchýk Baıraktar jańa Bayraktar TB3 soqqy jasaıtyn ushqyshsyz ushý apparattarynyń múmkindikteri týraly da aıtty. Bul drondar qysqa ushý-qoný jolaǵy bar áskerı kemelerden usha alatyn kórinedi.

— Bul baǵytta AQSh ta, basqa elder de básekege tústi. Biraq bul jobany sátti aıaqtaǵan alǵashqy el — Túrkııa. Bayraktar TB3 túrli aýa raıy jaǵdaıynda teńiz kemelerinde 170 ret avtomatty túrde ushyp-qonýdy júzege asyrdy, — dedi ol.

Budan buryn Túrkııa 2025 jyldyń sońyna deıin taýarlar men qyzmetterdiń eksport kólemin 390 mıllıard dollarǵa jetkizýdi kózdep otyrǵanyn jazǵanbyz.