Uldana Myrzýannyń qazasyna qatysty sot: sottalýshynyń advokaty ǵımarattyń opyrylý sebepterin atady
ASTANA. KAZINFORM – Feldsher Uldananyń qazasyna qatysty sot otyrysy jalǵasyp jatyr. Sottalýshy Sáýle Jubanııazovanyń advokaty Ashat Álimov qorǵaý sózin sóıledi.
Advokat aıyptaý tarapy onyń qorǵaýyndaǵy adamnyń áreketi men ǵımarat kirpishteriniń opyrylýy arasynda tikeleı baılanys bar ekenin dáleldeı almaǵanyn málimdedi.
Onyń sózinshe, Jubanııazova men qorǵaý tarapy qaza bolǵan qyzdyń otbasyna kóńil aıtady. Alaıda qaıǵyly oqıǵa kezinde páter ıeleri kooperatıvi tóraıymy qyzmetin atqarǵany onyń avtomatty túrde kináli ekenin bildirmeıdi.
– Qylmystyq zań jaýapkershilikti sońǵy atqarǵan laýazym nemese sońǵy qoıylǵan qol qaǵıdaty boıynsha belgilemeıdi, – dedi Ashat Álimov.
Qorǵaýshynyń aıtýynsha, Jubanııazovany kináli dep taný úshin onyń naqty qandaı mindeti bolǵanyn, qaýip týraly bilgenin, ony oqıǵaǵa deıin anyqtaı alatyn múmkindigi bolǵanyn, opyrylýdyń aldyn alýǵa múmkindigi bar-joǵyn jáne áreketsizdigi men qaıǵyly oqıǵa arasynda tikeleı sebep-saldarlyq baılanys bar ekenin dáleldeý qajet.
Advokat 2026 jylǵy 22 mamyrdaǵy №2673 sot qurylys-tehnıkalyq saraptamasynyń qorytyndysyna silteme jasady. Onyń aıtýynsha, mamandar ǵımarattyń qurylys tehnologııasy men konstrýktsııalyq sheshimderine baılanysty kóptegen aqaýlardy anyqtaǵan. Olardyń qatarynda armatýralyq torlardyń bolmaýy, qalaý eritindisi beriktiginiń tómendigi, kirpish qalaý talaptarynyń buzylýy jáne qaptama qabatynyń jetkiliksiz bekitilýi bar.
– Sarapshylardyń bul qorytyndylary opyrylýdyń sebebi tıisti deńgeıde kútim jasalmaýy emes, bastapqy qurylys aqaýlary bolǵanyn tikeleı rastaıdy. Bul aqaýlardy «Grajdanstroı» JShS 2004-2005 jyldary jibergen, – dedi qorǵaýshy.
Álimov, sondaı-aq, Jubanııazova páter ıeleri kooperatıvi tóraıymy qyzmetine 2025 jylǵy 12 mamyrda kiriskenin, al ǵımarat kirpishteri 8 qarashada, ıaǵnı sol jyldyń ishinde opyrylǵanyn atap ótti. Sonymen birge, qorǵaý tarapynyń málimetinshe, 2017 jylǵy tehnıkalyq qorytyndy jańa tóraıymǵa qujattardy qabyldaý-tapsyrý aktisinde kórsetilmegen.
Qorǵaý tarapy sottyń nazaryn buǵan deıin páter ıeleri kooperatıvi tóraıymy bolǵan Ahmetovaǵa da aýdardy. Advokattyń aıtýynsha, ol tehnıkalyq qorytyndy men ǵımaratta anyqtalǵan máselelerden habardar bolǵan.
Budan bólek, advokat sotqa deıingi kezeńde Jubanııazovanyń protsestik quqyqtary buzylǵanyn málimdedi. Sebebi, bastapqyda odan qarapaıym kýáger retinde jaýap alynǵan.
Álimov páter ıeleri kooperatıvi tóraıymy úıdi basqarýdyń jalǵyz organy emes ekenin de erekshe atap ótti. Onyń aıtýynsha, kúrdeli jóndeý júrgizý týraly sheshimder zańda belgilengen basqarý júıesi aıasynda qabyldanady. Al tóraıymnyń mindetteri negizinen uıymdastyrýshylyq sıpatty qamtıdy.
– Osy derektersiz «jóndeý jumystaryn uıymdastyra aldy» degen tujyrym jaı boljam bolyp qalady. Qylmystyq jaýapkershilik boljamdarǵa negizdelmeýi tıis, – dedi advokat.
Sóziniń sońynda qorǵaýshy aıyptaý tarapy Jubanııazovanyń páter ıeleri kooperatıvi tóraıymy qyzmetinde bolǵanyn ǵana dáleldedi dep málimdedi. Alaıda onyń pikirinshe, Jubanııazovanyń áreketsizdigi ǵımarattyń opyrylýyna jáne feldsher Uldananyń qaza bolýyna sebep bolǵanyn aıyptaý tarapy dáleldeı alǵan joq.
Aıta keteıik, buǵan deıin Uldana Myrzýannyń qazasyna qatysty iste sot advokattyń ótinishhatyn qanaǵattandyrmaǵanyn jazǵanbyz.
