Uldana Myrzýannyń qazasyna qatysty is: qorǵaý tarapy isti qaıta tergeýge jiberýdi surady
ASTANA. KAZINFORM — Uldana Myrzýan isi boıynsha kezekti sot otyrysy bastaldy.
Sot otyrysy barysynda páter ıeleri kooperatıviniń tóraıymy Sáýle Jubanııazovanyń advokaty Dáýren Eslıambekuly qylmystyq isti qosymsha tergeý júrgizý úshin prokýrorǵa qaıtarý týraly ótinishhat mátinin málimdedi.
Qorǵaý tarapynyń pikirinshe, sotqa deıingi tergeý barysynda mańyzdy mán-jaılar tolyq zerttelmegen. Atap aıtqanda, Jubanııazovanyń kinási, kinániń nysany, sondaı-aq onyń áreketi nemese áreketsizdigi men bolǵan qaıǵyly oqıǵa arasyndaǵy sebep-saldarlyq baılanys tolyq anyqtalmaǵan.
Advokattyń aıtýynsha, Jubanııazova páter ıeleri kooperatıviniń tóraıymy qyzmetine tek 2025 jyldyń mamyr aıynda kelgen. Oǵan deıin úıdi uzaq ýaqyt boıy burynǵy tóraıym Ahmetova basqarǵan. Ol qujattardy Jubanııazovaǵa tapsyra otyryp, ǵımarattyń jaǵdaıy jaqsy ekenin aıtqan.
— Meniń qorǵaýymdaǵy Jubanııazova páter ıeleri kooperatıviniń tóraıymy bolyp 2025 jyldyń mamyr aıynda taǵaıyndaldy. Oǵan deıin uzaq ýaqyt boıy tóraıym qyzmetin Ahmetova atqarǵan. Jubanııazova bul úıdi jobalaýǵa nemese salýǵa qatysqan tulǵa emes, merdiger de emes, avtorlyq qadaǵalaý júrgizbegen jáne ınjenerııa salasynda arnaıy bilimi joq, — dedi qorǵaýshy.
Qorǵaý tarapy is júrgizý barysynda da zań buzýshylyqtar bolǵanyn atap ótti. Advokattyń sózinshe, Jubanııazova sotqa deıingi tergeýdiń basym bóliginde kýáger mártebesinde bolǵan, al kúdikti retinde is qaraýdyń sońǵy kezeńinde ǵana tanylǵan.
Sonymen qatar, qorǵaý tarapy is materıaldaryndaǵy birqatar hattamalardyń rásimdelýinde kemshilikter bar dep sanaıdy. Atap aıtqanda, keıbir tergeý áreketteriniń júrgizilgen ýaqyty kórsetilmegen jáne qorǵaýshynyń qoly qoıylmaǵan.
Saraptama qandaı nátıje kórsetti
Advokat qurylys-tehnıkalyq saraptamanyń qorytyndysyna nazar aýdardy. Qorytyndyǵa sáıkes, 2025 jylǵy 8 qarashada bolǵan opyrylýǵa konstrýktsııalyq aqaýlar men kirpish qalaý tehnologııasynyń buzylýy sııaqty birneshe sebepterdiń jıyntyǵy áser etken.
Atap aıtqanda, sarapshylar jobada qarastyrylǵan monolıtti armatýralanǵan beldeýlerdiń joqtyǵyn, qaptama qabatyndaǵy aqaýlardy, qalaý jikteriniń sapasyz toltyrylýyn, sondaı-aq jartylaı jáne synǵan kirpishterdiń qoldanylǵanyn anyqtaǵan.
Qorǵaýshynyń aıtýynsha, 2017 jyldyń ózinde qabyrǵadaǵy jaryqtar men qaptama qabatynyń jekelegen bólikteriniń buzylýy tirkelgen. Demek, mundaı jaǵdaılar Jubanııazova páter ıelereiniń kooperatıvi tóraıymy bolǵanǵa deıin de oryn alǵan.
— Opyrylý bir ǵana sebeptiń nátıjesi emes, deformatsııanyń uzaq ýaqyt boıy ýshyǵýy saldarynan bolǵan, — dedi advokat.
Osyǵan baılanysty qorǵaý tarapy Sáýle Jubanııazovanyń qaýipti aqaýlardy óz betinshe anyqtaı alýy múmkin be, mamandardy tartý qajet boldy ma degen máselelerdi anyqtaý qajet dep esepteıdi. Sonymen qatar, opyrylýǵa deıin qajetti jumystardy júrgizýge páter ıeleri kooperatıviniń qarjylyq múmkindigi boldy ma degen saýaldyń jaýabyn anyqtaýǵa qajet dep sanaıdy.
Sondyqtan advokat ótinishhatynda sottan isti qosymsha tergeý júrgizý úshin prokýrorǵa qaıtarýdy surady.
Odan bólek, qorǵaý tarapy qosymsha komıssııalyq qurylys-tehnıkalyq jáne qarjylyq-ekonomıkalyq saraptama júrgizýdi, jobalyq jáne atqarýshylyq qujattardy talap etýdi, sondaı-aq 2017 jyldan beri úıdegi jaryqtar týraly kimder bilgenin anyqtaýdy surap otyr.
Aıta keteıik, buǵan deıin Uldana Myrzýannyń kúıeýi Astana ákimdiginen alǵan 20 mln teńgeni qaıda jumsaǵanyn aıtyp bergenin jazǵanbyz.
Sonymen qatar, feldsher Uldana Myrzýannyń kúıeýi jábirlenýshi mártebesinen bas tartty.
