Uldana Myrzýannyń qazasyna qatysty kelesi sot otyrysy 24 tamyzda ótedi
ASTANA. KAZINFORM – Jedel járdem feldsheri bolǵan Uldana Myrzýannyń qazasyna qatysty kelesi sot otyrysy 24 tamyzǵa belgilendi. Sot otyrysy saǵat 10:00-de Astana qalasynyń qylmystyq ister jónindegi aýdanaralyq sotynda ótedi.
Búgin sot jábirlenýshilerden jaýap alýdy jalǵastyrdy. Marqumnyń jubaıy Ádilet Zeınel Uldananyń qazasynan keıin otbasy alǵan 20 mln teńge týraly aıtyp, keıin jábirlenýshi mártebesinen ne sebepti bas tartqanyn túsindirdi.
Al marqumnyń anasy Sálıma Omarova qyzynyń qazasynan keıin qaryzǵa surap alǵan 4,5 mln teńge týraly aıtyp, onyń kóńil aıtý, eske alý sharalaryna jumsalǵanyn túsindirdi.
Taǵy bir jábirlenýshi Aınur Nurpeıisova oqıǵa bolǵan kúngi jaǵdaılardyń edáýir bóligin esine túsire almaıtynyn aıtyp, sottalýshyny naqty kináli dep aıta almady. Sonymen birge, ol densaýlyǵyna zaqym keltirgen adam zańǵa sáıkes jazalanýyn qalaıtynyn jetkizdi. A.Nurpeıisova dári-dármekke ketken shyǵyndary týraly da aıtty.
Budan bólek, sottalýshynyń advokaty Ashat Álimov is materıaldarymen tanysyp, jábirlenýshilerden jaýap alýdy jalǵastyrýǵa daıyndalý úshin ýaqyt berýdi qaıta surady. Sot qorǵaý tarabyna qylmystyq is materıaldaryn elektrondy túrde usynatyn boldy. Sondaı-aq advokattarǵa qujattardyń túpnusqalarymen tanysýǵa múmkindik beriledi.
Eske salaıyq, búgin Astanada jedel járdem feldsheri Uldana Myrzýannyń qazasyna qatysty ekinshi sot otyrysy jalǵasty.
Buǵan deıin qaza tapqan feldsher Uldana Myrzýannyń anasy Sálıma Omarova qudaǵıymen aqshalaı daý-damaı órbigenin aıtqan edi.
Sonymen birge, marqum feldsherdiń kúıeýi Á.Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
