Uldana Myrzýan isinde aıyptalýshy advokaty sotqa kelmeı qaldy
ASTANA. KAZINFORM — Astana qalasynyń qylmystyq ister jónindegi aýdanaralyq sotynyń sýdıasy Merýert Abaeva jedel járdem feldsheri Uldana Myrzýannyń qazasyna qatysty is boıynsha sottalýshynyń qorǵaýshysy Dáýren Eslámbekulyna qatysty jeke qaýly shyǵardy.
Qaýlyda kórsetilgendeı, 20 tamyzda qylmystyq is boıynsha sot otyrysy jábirlenýshi S. Omarovanyń jaýap alýyn jalǵastyrý úshin saǵat 15:00–ge deıin úziliske shyǵarylǵan. Protseske qatysýshylardyń barlyǵyna sotqa ýaqytyly kelý qajettigi habarlanǵan.
Alaıda belgilengen ýaqytta sottalýshynyń qorǵaýshysy — advokat Dáýren Eslámbekuly sot otyrysy zalyna kelmegen jáne óziniń qatysa almaıtyny týraly sotqa aldyn ala habarlamaǵan. Sot otyrysynyń hatshysyna telefon arqyly basqa protseste júrgenin aıtqan.
— Sot advokattyq qyzmet týraly zańnama advokattardy kásibı minez-qulyq erejelerin saqtaýǵa, onyń ishinde organdar men laýazymdy tulǵalarǵa qatysty ózin ádepti ustaýǵa, sondaı-aq isti qaraýdy qasaqana sozýǵa jol bermeýge mindetteıtinin eske salady, — dedi sýdıa Merýert Abaeva.
Sottyń pikirinshe, advokattyń dáleldi sebepsiz kelmeýi sot otyrysynyń ótýine kedergi keltirgen. Qaýlyda qorǵaýshynyń mundaı áreketi protsesti qasaqana sozýǵa jáne sot pen sot talqylaýyna qatysýshylardy qurmettemeýge ákep soqqany, sondaı-aq kásibı ádep normalarynyń buzylǵany atap ótilgen.
Osyǵan baılanysty sot advokattyń bul áreketine Astana qalasy Zań konsýltatsııasy prezıdıýmy men qalalyq Ádilet departamentiniń nazaryn aýdaryp, tıisti sharalar qabyldaýdy tapsyrdy. Ýákiletti organdar jeke qaýlyny qaraý nátıjesi men qabyldanǵan sharalar týraly bir aı ishinde sotqa habarlaýy qajet.
— Qaýly shyǵarylǵan kúnnen bastap 15 táýlik ishinde oǵan shaǵym nemese narazylyq keltirýge bolady, — dep habarlady sot.
Buǵan deıin qaza tapqan feldsher Uldana Myrzýannyń anasy Sálıma Omarova qudaǵıymen aqshalaı daý-damaı órbigenin aıtqan edi.
