Uldana Myrzýan isinde advokat sýdıaǵa qarsylyq bildirdi: Ýaqytsha úzilis jarııalandy
ASTANA. KAZINFORM — Feldsher Uldana Myrzýannyń qazasyna qatysty ekinshi sot otyrysynda qorǵaý tarapy sýdıa Merýert Abaevaǵa qarsylyq bildirdi.
Osydan keıin sot otyrysyna úzilis jarııalandy. Sýdıaǵa qarsylyqty basqa sýdıa nemese sot tóraǵasynyń mindetin atqarýshy tulǵa qaraýy qajet.
Úzilis jarııalanar aldynda sýdıa qorǵaý tarapynyń qarsylyqtary sot otyrysynyń hattamasyna engizilgenin túsindirdi. Onyń aıtýynsha, sottalýshynyń qorǵalý quqyǵy buzylǵan joq.
Merýert Abaevanyń aıtýynsha, 14 tamyzda sottalýshyny advokat Dáýren Eslámbekuly qorǵaıtyny belgili bolǵan. Oǵan qylmystyq is materıaldarymen tanysýǵa ýaqyt berilgen.
— Bul jaǵdaıda sottalýshynyń qorǵalý quqyǵy buzylǵan joq. Sebebi 2026 jylǵy 14 tamyzda sottalýshyny advokat Dáýren Eslámbekuly qorǵaıtyny belgili boldy. Oǵan qylmystyq is materıaldarymen tanysýǵa ýaqyt berildi, — dedi sýdıa.
Sonymen qatar, sýdıanyń aıtýynsha, sottalýshyǵa da, onyń qorǵaýshysyna da qylmystyq is materıaldarynyń tolyq kóshirmeleri qaǵaz jáne elektrondy túrde berilgen.
Sot otyrysynda aıyptalýshynyń jańa advokaty Ashat Álimov QR Qylmystyq-protsestik kodeksiniń 87-baby («Sýdıaǵa qarsylyq bildirý») tártibimen tóraǵalyq etýshi sýdıaǵa qarsylyq bildirdi. Osyǵan baılanysty qarsylyqty qaraý úshin sot otyrysyna úzilis jarııalandy.
— Osy sot otyrysynda sýdıaǵa qarsylyq bildirildi. Demek, qorǵaý tarapynyń tóraǵalyq etýshi sýdıaǵa qarsylyq bildirýge qatysty ýájderi bar. Sondyqtan qarsylyqty sheshý úshin sot otyrysyna úzilis jarııalanady, — dedi Merýert Abaeva.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Іs boıynsha prokýrorlar resmı aıyptaý aktisin jarııalady.
Buǵan deıin sot jańa qorǵaýshynyń qylmystyq is materıaldarymen tanysýǵa qosymsha ýaqyt berý týraly ótinishi qanaǵattandyrmaǵan edi.
