Uldana Myrzýan isin júrgizetin sýdıa sottan shettetilmedi
ASTANA. KAZINFORM — Astana qalasynyń qylmystyq ister jónindegi aýdanaralyq sotynyń sýdıasy S. Sembaev feldsher U. Myrzýan qazasyna qatysty sot otyrysynda sýdıaǵa qarsylyq tanytqan advokat ótinishin qanaǵattandyrmady.
Sot talqylaýynda aıyptalýshy Sáýle Jubanııazovanyń qorǵaýshysy Ashat Álimov tóraǵalyq etýshi sýdıa Merýert Abaevaǵa qarsylyq bildirý týraly ótinish bergen edi. Oǵan sýdıa M. Abaevanyń advokattyń sot talqylaýyn keıinge qaldyrý jáne qylmystyq is materıaldarymen tanysýǵa ýaqyt berý týraly ótinishin qanaǵattandyrmaýy sebep bolǵan.
Advokat bul iske tek 2026 jylǵy 20 tamyzda kiriskenin kórsetip, jetkilikti ýaqyttyń bolmaýy óz qorǵaýyndaǵy S. Jubanııazovanyń Konstıtýtsııamen kepildik berilgen qorǵalý quqyǵyn buzatynyn, sondaı-aq onyń qorǵaýshy retindegi quqyqtaryn shekteıtinin aıtqan. QR Qylmystyq-protsestik kodeksiniń 87-baby 1-bóliginiń 6) tarmaǵyna silteme jasap, sýdıanyń osy istiń nátıjesine jeke, tikeleı nemese janama túrde múddeli ekenin alǵa tartqan.
Sot otyrysynda sýdıa Abaeva qarsylyqty qaraý úshin úzilis jarııalady. Ony Astana qalasynyń qylmystyq ister jónindegi aýdanaralyq sotynyń sýdıasy Samat Sembaev qarady.
— Sot protseske qatysýshylardyń pikirlerin tyńdap, mynadaı qorytyndyǵa keldi. Qylmystyq-protsestik kodekstiń 87-babynyń 1-bóliginde kózdelgen sýdıaǵa qarsylyq bildirý negizderiniń tizbesi keńeıtilgen túsindirýge jatpaıdy. Bul jaǵdaıda qarsylyq bildirýge advokattyń ótinishin qanaǵattandyrýdan bas tartý túrinde tóraǵalyq etýshi sýdıa qabyldaǵan protsestik sheshim negiz bolǵan. Alaıda muny istiń nátıjesine degen jeke múddelilik dep baǵalaýǵa bolmaıdy. Osy mán-jaılardy eskere otyryp, qorǵaýshy sýdıa Abaevany qylmystyq isti qaraýǵa qatysýdan shettetý qajet dep sanaıtyn negizder orynsyz dep tanylady. Sebebi sýdıanyń istiń nátıjesine jeke múddeli ekenin kórsetetin jetkilikti dálelder usynylmaǵan, — dedi Samat Sembaev.
Osylaısha, sottalýshy S. Jubanııazovanyń qorǵaýshysy, advokat A. Álimovtyń qylmystyq is boıynsha tóraǵalyq etýshi sýdıa M. Abaevaǵa bildirgen qarsylyǵy qanaǵattandyrylmady.
Qaýlyǵa shaǵym berýge bolmaıdy. Qaýlymen kelispeý týraly ýájder apellıatsııalyq shaǵymda jáne prokýrordyń ótinishhatynda kórsetilýi múmkin.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Buǵan deıin sot jańa qorǵaýshynyń qylmystyq is materıaldarymen tanysýǵa qosymsha ýaqyt berý týraly ótinishin qanaǵattandyrmady.
Sol sebepti qorǵaý tarapy sýdıa Merýert Abaevaǵa qarsylyq bildirdi.
