Uldana Myrzýan isi: Turǵyndar PIK tóraǵasynyń qalaı jumys istegenin aıtyp berdi
ASTANA. KAZINFORM — Feldsher Uldana Myrzýan qaza bolǵan úıdiń turǵyndary sotta úıdiń jaǵdaıy men PIK jumysy týraly jaýap berip jatyr. Kýáger Marına Samsonovanyń sózinshe, turǵyndar 2017 jyly júrgizilgen tehnıkalyq tekserý nátıjesin tek qaıǵyly oqıǵadan keıin estigen.
Kýágerdiń aıtýynsha, qasbet qulaǵansha turǵyndar arasynda úıdi jóndeý qajettiligi nemese onyń tehnıkalyq jaǵdaıy talqylanbaǵan. Al 2017 jyly júrgizilgen tehnıkalyq tekserý qorytyndysy týraly ol feldsher óliminen keıin ǵana estigen.
Tekserý qorytyndysymen tanysqan soń turǵyndar jaǵdaıdy úı chatynda talqylap, memlekettik organdarǵa júgingen.
— Biz birden hat joldadyq. 33-páterde turatyn bir turǵyn bar, ol úıde bolyp jatqan jaǵdaı týraly únemi basqa turǵyndarǵa aqparat berip otyrady. Ony úılestirýshi deýge bolady. Qaı mekemege jáne naqty qaıda júginý keregin aıtyp otyrady, — dedi kýáger.
Onyń aıtýynsha, saraptamalyq materıaldarda kórsetilgen aqaýlardyń bar ekenin de osydan keıin bilgen.
Marına Samsonova prokýror suraqtaryna jaýap berip, aıyptalýshy Sáýle Jubanııazova PIK tóraǵasy bolyp saılanǵan soń, qalaı jumys istegenin aıtyp berdi.
Kýágerdiń aıtýynsha, Sáýle Jubanııazova elektrıkpen birge kireberisterdegi elektr qalqandarynyń jaǵdaıyn baqylaǵan. Sonymen qatar, qar tazalaý jumystaryn uıymdastyrǵan.
Atap aıtqanda, qys mezgilinde ol Marına Samsonovanyń kúıeýi jáne ulymen birge úıdiń shatyryndaǵy qardy ózi tazalaǵan. Lıft shahtasy mańynan sý aqqandyqtan, qardy tazalaýǵa týra kelgen.
— Lıft shahtasyna sý aqty. Sondyqtan lıft mamandary birneshe kún boıy bári kepkenshe toǵyzynshy qabatqa jaıaý kóterilýge týra keletinin aıtty. Buǵan jol bermeý úshin shatyrdaǵy qardy túsirý kerek boldy, — dep túsindirdi Marına Samsonova.
Qorǵaýshy advokat Marına Samsonovadan qasbet qulaǵansha qabyrǵadaǵy jaryqtardy, túsip jatqan kirpishterdi nemese qasbettiń ózge de zaqymdaryn baıqaǵan-baıqamaǵanyn surady.
Kýáger mundaı jaıttarǵa nazar aýdarmaǵanyn jáne úıdiń apatty jaǵdaıda bolǵanyn bildiretin belgilerdi kórmegenin aıtty.
Qasbet qulaǵan soń ǵana turǵyndar úıdiń jaǵdaıyn belsendirek talqylaı bastaǵan. Qazir olar qaýipti aýmaqty ózderi qyzyl lentamen qorshap, qazaq jáne orys tilderinde eskertý taqtaıshalaryn ornatqan.
Buǵan deıin aıyptalýshy Sáýle Jubanııazovaǵa deıin Páter ıeleri kooperatıvin basqarǵan Gúljaýhar Ahmetovadan jaýap alynǵan edi.
Feldsher óliminen keıin TJD bólimshe komandıriniń qyzmeti tómendegen.
