Uldana Myrzýan isi: Sottalýshynyń advokaty aýysyp, otyrysty keıinge qaldyrýdy surady
ASTANA. KAZINFORM — Astanada feldsher Uldana Myrzýannyń qazasyna qatysty sot otyrysy jalǵasyp jatyr. Sotta aıyp taǵylǵan PIK tóraǵasy Sáýle Jubanııazovanyń jańa qorǵaýshysy Ashat Álimov sot otyrysy ótetin kúni iske kiriskenin aıtyp, qylmystyq is materıaldarymen tanysýǵa jáne qorǵaý ustanymyn ázirleýge ýaqyt berýdi surady.
Búgingi sot otyrysynda sýdıa protsestiń jańa qatysýshylaryn tanystyrdy.
Atap aıtqanda, jábirlenýshi Aınur Nurpeıisovanyń múddesin qorǵaýǵa Astana qalasynyń zań konsýltatsııasynyń advokaty Jadyra Qurymbaeva taǵaıyndaldy. Al sottalýshy Sáýle Jubanııazovanyń qorǵaýshysy retinde Ashat Álimov qosyldy.
Sot quramyn jarııalaǵannan keıin eki advokat ta qarsylyqtary joq ekenin málimdedi. Olar buǵan deıingi sot otyrysyna qatyspaǵandyqtan, sýdıa olardyń qandaı da bir ótinishhattary bar-joǵyn da naqtylady.
Advokat Ashat Álimov Saýle Jubanııazovanyń múddesin qorǵaýǵa tapsyrmany tek 20 tamyzda alǵanyn jáne sol kúni qylmystyq iske qatysa bastaǵanyn aıtty.
Onyń sózinshe, is sotqa 14 tamyzda túsken, al aldyn ala tyńdaý 18 tamyzda ótken. Sol kezde sottalýshynyń buǵan deıingi qorǵaýshysy is materıaldarymen tanysý týraly ótinishhat bergen. Osydan keıin sot kelesi otyrysty 20 tamyzǵa belgilegen.
– Qurmetti sot, búgin iske jańadan kirisken qorǵaýshy retinde qylmystyq is materıaldarymen tolyq tanysýǵa, taǵylǵan aıypty zerdeleýge, dáleldemeler bazasyn taldaýǵa, is júrgizý qujattaryn baǵalaýǵa, qorǵaý ustanymyn aıqyndap, ony qorǵaýymdaǵy adammen kelisýge, sondaı-aq ótinishhattar, aryzdar jáne ózge de qajetti is júrgizý qujattaryn daıyndaýǵa jetkilikti ýaqytym bolǵan joq, – dedi A. Álimov.
Advokat Qylmystyq-protsestik kodeks normalaryn keltirip, qorǵaýshy qylmystyq protsestiń kez kelgen kezeńinde iske kirise alatynyn aıtty. Al sot talqylaýy barysynda iske jańadan kirisken advokatqa qorǵaýǵa daıyndalý úshin qajetti ýaqyt berilýge tıis.
– Buǵan deıingi qorǵaýshyǵa is materıaldarymen tanysý múmkindiginiń berilýi iske jańadan kirisken qorǵaýshyǵa materıaldardy óz betinshe zerdelep, óziniń qorǵaý ustanymyn ázirleýge qajetti ýaqyttyń berilýin almastyrmaıdy, – dep atap ótti advokat.
A. Álimovtyń pikirinshe, onyń iske kirisken kúni sot talqylaýyn jalǵastyrý sottalýshynyń bilikti ári tıimdi zań kómegin alý quqyǵyn shekteýi múmkin.
Osyǵan baılanysty qorǵaýshy sottan ony S. Jubanııazovanyń advokaty retinde iske qatystyrýdy, qorǵaýdy qabyldaǵany týraly jazbasha habarlamany is materıaldaryna qosýdy jáne qylmystyq is materıaldarymen tolyq tanysýǵa ýaqyt berýdi surady.
Sonymen qatar advokat sot talqylaýyn dáleldemelerdi zerdeleýge, qorǵaýyndaǵy adammen ustanymdy kelisýge jáne qorǵaý jelisin ázirleýge jetkilikti merzimge keıinge qaldyrý týraly ótinishhat berdi.
Eske sala ketsek, feldsher Uldana Myrzýan ólimine qatysty alǵashqy sot otyrysy 18 tamyzda bastalǵan edi.
Іs boıynsha prokýrorlar resmı aıyptaý aktisin jarııalady.
Buǵan deıin sot Ádilet Zeıneldiń jábirlenýshi bolýdan bas tartý jaıly ótinishin qanaǵattandyrmady.
