Uldana Myrzýan isi: Sot burynǵy PIK tóraǵasyn tyńdady
ASTANA. KAZINFORM — Astanada feldsher qazasyna qatysty sotta aıyptalýshy Sáýle Jubanııazovaǵa deıin Páter ıeleri kooperatıvin basqarǵan Gúljaýhar Ahmetovadan jaýap alyndy.
Turǵyndar úıdegi jaryqtarǵa shaǵymdanǵan
Óz jaýabynda Gúljaýhar Ahmetova páter ıeleriniń shaǵymdary, úıdiń tehnıkalyq jaǵdaıy jáne ár jyldary júrgizilgen jóndeý jumystary týraly aıtyp berdi.
Onyń aıtýynsha, turǵyndar eki chatta baılanysqan. Birinde resmı aqparat pen qarjylyq esepter jarııalansa, ekinshisi kórshilerdiń ózara sóılesýine arnalǵan.
Prokýror kýágerden úıdiń jaǵdaıyna qatysty shaǵymdar týraly surady. Gúljaýhar Ahmetova 29-páter ıesiniń shaǵymyn eske aldy. Osy ótinishten keıin 2017 jyly úıdiń tehnıkalyq jaǵdaıy tekserilgen.
Sonymen qatar 36, 40 jáne 45-páterlerdiń turǵyndary da qabyrǵalardaǵy jaryqtarǵa shaǵymdanǵan. Kýágerdiń aıtýynsha, páterlerdiń birinde edende de jaryq paıda bolǵan.
— 36-páterdiń turǵyny qabyrǵada jaryq paıda bolǵanyn aıtyp shaǵymdandy. 40-páterde qabyrǵa men edende jaryq bolǵan. 45-páterden de dál osyndaı shaǵym tústi. Bul men jumysqa kelmeı turyp, 2005 nemese 2006 jyldary úıdi qabyldaý kezinde bolǵan, — dedi Gúljaýhar Ahmetova.
Jaryqtar qalaı jóndeldi
Kýágerdiń aıtýynsha, turǵyndar shaǵymdanǵannan keıin oqıǵa ornyna ákimdik ókilderi kelgen. Turǵyndarǵa jaryqshaqtyń paıda bolýyn kirpish úıdiń shógýi dep túsindirgen.
Gúljaýhar Ahmetova shatyrdy jóndeý kezinde de qabyrǵalardan jaryqtar tabylǵanyn aıtty. Olardy jóndeý úshin ónerkásiptik alpınıster tartylǵan.
— Men jumysty qabyldap alǵan kezde shatyrdy jóndedik. Sol kezde osy jaryqtardy kórip, jóndeý jumystaryn júrgizdik. Alpınısterge úıdiń shetin de tekserýdi tapsyrdym, sebebi ol jerge de qatysty shaǵym bolǵan, — dedi ol.
Burynǵy tóraǵanyń sózinshe, jóndeý jumystary negizinen birlestik qarajaty esebinen júrgizilgen. Bul úshin turǵyndardan qosymsha maqsatty qarajat jınalmaǵan.
Sondaı-aq ol úıdi teksergen ónerkásiptik alpınısterdiń jumysyna aqy tólengenin aıtty.
Buǵan deıin sot aldynda Tótenshe jaǵdaılar departamentiniń kezekshi bólim bastyǵy Rızabek Daıyrov jaýap bergen edi. Ol ǵımarat qasbeti qulaǵan soń qutqarýshylardyń qalaı áreket etkenin aıtyp berdi jáne shuǵyl qyzmetterdiń ózara is-qımyl tártibin baıandady.
Feldsher óliminen keıin TJD bólimshe komandıriniń qyzmeti tómendegen.
