Uldana Myrzýan isi: Qasbeti qulaǵan úıde jańa jaryqshaqtar paıda boldy
ASTANA. KAZINFORM – Astanada jedel járdem feldsheri Uldana Myrzýannyń qazasyna qatysty sot otyrysynda sottalýshy, MIB tóraǵasy Sáýle Jubanııazova qasbeti qulaǵan turǵyn úıde jańa jaryqshaqtar paıda bolǵanyn aıtty.
– Qasbet qulamaı turǵan kezde úıde eshbir qaýiptiń belgisi bolǵan joq. Ózim turatyn páterde de eshteńe bolǵan emes. Al qazir, shamamen bir apta buryn Tótenshe jaǵdaı mınıstrliginiń mamandaryn shaqyrdyq. Páterimniń tóbesinde jaryqshaq paıda boldy, – dedi Sáýle Jýbanııazova.
Ol sondaı-aq birinshi kireberis jaǵyndaǵy páterlerdi qarap, basqa bólmelerden de aqaýlar anyqtaǵanyn aıtty.
– Qazir tıisti organdarǵa hat jazyp, TJM ókilderin shaqyryp jatyrmyz. Bir shara qoldanýǵa kómektesse eken deımiz, óıtkeni muny óz kúshimizben jasaı almaımyz. Qasbettiń bir bóligin alyp tastaýǵa nemese ony kúsheıtýge qajetti tehnıkany jaldaýǵa qarajatymyz da joq, – dedi sottalýshy.
Budan bólek, S. Jubanııazova úıdi jóndeýge qatysty shara qoldanýǵa tyrysqanyn aıtty.
Alaıda onyń sózinshe, páter ıeleri usynylǵan jóndeý nusqasynan bas tartqan.
– 51 paıyzdan astam turǵyn qarsy daýys berip, «Bul óte qymbat, bizdiń shamamyz jetpeıdi» dedi. Men jınalysty uıymdastyrdym, «Órken qala» ókilderin shaqyrdym, ákimdikke júgindim, ýchaskelik polıtsııa qyzmetkeri de kelip, turǵyndarǵa túsindirdi. Biraq turǵyndar bas tartty, – dedi ol.
Sotalýshy MIB tóraǵasy mundaı aýqymdy jóndeý jumystaryn turǵyndardyń kelisiminsiz jeke ózi júrgizý týraly sheshim qabyldaı almaıtynyn jáne páter ıeleriniń qarajatyn tıisti sheshimsiz jumsaýǵa quqyǵy joq ekenin atap ótti.
Buǵan deıin qurylys salasynyń mamany Veronıka Lobaeva turǵyn úıdiń qasbeti ne sebepti qulaǵanyn aıtqan edi.
Buǵan deıin S. Jubanııazova úıdi qandaı jaǵdaıda qabyldap alǵanyn aıtty.
