Uldana Myrzýan isi: Injener qasbeti qulaǵan úıdiń qandaı kúıde bolǵanyn aıtty
ASTANA. KAZINFORM — Astanada feldsher Uldana Myrzýannyń qazasyna qatysty sot otyrysy jalǵasyp jatyr. Kezekti sot otyrysynda 2020 jyldan beri osy úıde turatyn Konstantın Kostenko kýálik berdi. Ol ǵımaratpen qurylys kezinde-aq tanys bolǵan, sol kezde ınjenerlik jelilerdi júrgizýge qatysqan.
Onyń aıtýynsha, qaıǵyly jaǵdaıǵa deıin turǵyndar PIK tóraǵasy Saýle Jubanııazovanyń jumysyna shaǵym aıtpaǵan. Kerisinshe, ol úıge qatysty máselelerdi sheshýge belsendi aralasyp, bastamashyl turǵyndarmen únemi baılanysta bolǵan.
— Ol únemi birdeńe istep júretin. Úıimizde belsendi turǵyndardan quralǵan top bar. Ol bizben únemi baılanysyp, qandaı da bir isti jasaýdy usynatyn. Turǵyndardan onyń áreketsizdigine nemese mindetterin tıisinshe oryndamaǵanyna qatysty shaǵym estigen joqpyn, — dedi kýáger.
Sonymen birge, 2025 jylǵy 8 qarashaǵa deıin K. Kostenko kirpish qaptamasy qulaǵan úıdiń soltústik-batys bóliginen jaryqshaq baıqamaǵan. Onyń aıtýynsha, úıdiń bul bóligi turǵyndardyń únemi nazarynda bolmaǵan. Kýágerdiń ózi qurylys ınjeneri mamandyǵyn alǵan, onyń kásibı baǵyty sýmen jabdyqtaý, káriz jáne ınjenerlik jelilermen baılanysty.
— Biz 100 metr jerdegi nárseni kóretin suńqar emespiz. Úıdiń bıiktigi shamamen 27 metr. Eger jaryqshaqtardy kórgen nemese olardyń bar ekenin bilgen bolsaq, dúrbi alyp qarap shyǵar edik. Biraq úıdiń mundaı jaǵdaıǵa jetetinin oılaǵan joqpyz, — dep túsindirdi K. Kostenko.
Qasbettiń opyrylǵan kúnin eske alǵan kýáger úıde bolǵanyn jáne terezeden kóterilgen shańdy kórgenin aıtty. Syrtqa shyqqanda, oqıǵa ornynda jedel járdem brıgadasy bolǵan. Onyń sózinshe, shamamen 8-10 mınýttan keıin tótenshe jaǵdaılar qyzmetiniń mamandary kelgen.
Osydan keıin K. Kostenko oqıǵa ornyn qarap shyǵyp, kirpish qaptamasynyń jaǵdaıyna nazar aýdarǵan. Injener retinde ol qasbettiń jaǵdaıyna syrtqy kirpish qaptamasynyń qabyrǵaǵa bekitilý erekshelikteri men jekelegen ýchaskelerdegi eritindi áser etýi múmkin dep topshylady. Sondaı-aq kórshiles kommertsııalyq ǵımarattyń ornalasýyna, jel, jańbyr jáne qardyń qasbetke áserine nazar aýdardy. Bul rette kýáger munyń kásibı boljamy ekenin atap ótti.
Sotta kýágerge Uldana Myrzýannyń jaraqat alý jaǵdaılary týraly da suraq qoıyldy. Ol feldsherdiń ústine kondıtsıonerdiń syrtqy blogy qulaýy múmkin dep boljady. Alaıda oqıǵanyń ózin kórmegenin moıyndady.
— Muny óz kózimmen kórgen joqpyn. Men tek logıkalyq qorytyndy jasadym. Bul aqparatty BAQ-tan oqydym, — dep naqtylady kýáger.
Budan bólek, K. Kostenko úıge 2017 jyly júrgizilgen tehnıkalyq zertteý qorytyndysy týraly keıin bilgenin aıtty. Onyń sózinshe, eger qujatta ǵımarattyń tehnıkalyq jaǵdaıynda eleýli problemalar bary kórsetilse, onyń jaı-kúıine jaýapty mamandar bul aqparatpen aldyn ala tanysýy kerek bolǵan.
Eske salaıyq, Uldana Myrzýan jedel járdem feldsheri bolyp qyzmettik mindetin atqarý kezinde kópqabatty úıdiń qasbeti qulap, qaza tapqan. Osy fakti boıynsha Astana sotynda qylmystyq is qaralyp jatyr.
Sot otyrysynda marqum feldsherdiń jubaıy Ádilet Zeınel áıelimen ótken sońǵy saǵattar týraly aıtyp bergen edi.
Sondaı-aq, Á. Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
Buǵan deıin elordalyq Turǵyn úı jáne turǵyn úı ınspektsııasy qasbeti qulaǵan úıdiń apatty jaǵdaıy týraly ótinish túspegenin aıtqan edi.
Sonymen qatar, Ónerkásip mınıstrligi Páter ıeleri kooperatıvi tóraǵasynyń mindetterin túsindirdi.
