Uldana Myrzýan isi: Feldsher óliminen keıin bólimshe komandıriniń qyzmeti tómendegen
ASTANA. KAZINFORM — Qarasha aıynda qaza tapqan feldsher isi boıynsha sot otyrysy jalǵasyp jatyr. Kezekti kýáger retinde oqıǵa ornyndaǵy qutqarý jumystaryna qatysqan Astana qalasy Tótenshe jaǵdaılar departamentiniń qyzmetkeri Aıan Kemiprov jaýap berdi. Ol qaıǵyly oqıǵadan keıin bólimshe komandıri qyzmetinen órt sóndirýshi qyzmetine tómendegenin aıtty.
Kýágerdiń sózinshe, kadrlyq sheshim osy oqıǵadan keıin qabyldanǵan. Oǵan raport jazý usynylyp, basqa bólimge aýystyrylǵan. Bul rette oǵan qatysty jeke tártiptik is júrgizilmegen.
A. Kempirov óz qyzmetiniń tómendetilýi jumys barysynda jibergen kemshilikterine baılanysty ma degen suraqqa naqty jaýap bere almady.
— Qazir órt sóndirýshimin. Osy jaǵdaıǵa baılanysty qyzmetim tómendetildi. Oqıǵa bolǵan kúni bólimshe komandıri boldym. Buıryq boıynsha raport jazdym. Sodan keıin basqa bólimge aýystyryldym, — dedi Kemiprov.
Kýáger raporttyń mazmunyna qatysty pikir bildirýden bas tartty.
Sonymen birge A. Kempirov ǵımarat qasbeti qulaǵan jerde qutqarýshylardyń qalaı jumys istegenin aıtyp berdi. Ol bes adamnan turatyn bólimshe quramynda oqıǵa ornyna barǵan. Kýágerdiń aıtýynsha, úıindilerdiń arasynda kondıtsıoner bolǵan. Alaıda qutqarýshylardyń negizgi mindeti adamdardy qutqarý bolǵandyqtan, qurylys elementteriniń naqty kólemin baǵalaı almaǵan.
Keıin TJD-nyń basqa qyzmetkerleri shatyrǵa kóterilip, onda jatqan kirpishterdi alyp tastaǵan.
Budan bólek, sotta oqıǵa ornynda bolǵan qaraýyl bastyǵy keıin óz erkimen jumystan shyǵý týraly raport jazǵany aıtyldy. A. Kemiprovtyń aıtýynsha, bul mamyr aıynda bolǵan, alaıda jumystan shyǵý sebepterin naqty bilmeıdi.
Buǵan deıin sot aldynda Tótenshe jaǵdaılar departamentiniń kezekshi bólim bastyǵy Rızabek Daıyrov jaýap bergen edi. Ol ǵımarat qasbeti qulaǵan soń qutqarýshylardyń qalaı áreket etkenin aıtyp berdi jáne shuǵyl qyzmetterdiń ózara is-qımyl tártibin baıandady.
Taǵy bir jábirlenýshi alǵan aýyr jaraqatyn aıtyp, ótemaqy talap etti.
