Uldana Myrzýan qazasyna qatysty is: jábirlenýshi alǵan aýyr jaraqatyn aıtyp, ótemaqy talap etti
ASTANA. KAZINFORM — Feldsher Uldananyń qazasyna qatysty sot otyrysynda jábirlenýshi Gúlnár Qalıeva qaıǵyly oqıǵanyń qalaı bolǵanyn baıandady.
— 2025 jyly 8 qarashada sińlim Aınur ekeýimiz saǵat 10 jarymǵa qaraı inim Jangeldiniń úıine barmaq bolyp, «Korzınka» dúkenine kiremiz degende, ústimizden kirpishter qulady. Men túsinbeı qaldym. Bir qolmen basymdy jaýyp úlgerdim, kirpishtiń arasynan keýdem qysylyp, daýsym yńyrsyp áreń shyqty. Sińilim joq. Dúkennen eki jigit shyǵyp, ústimnen kirpishti tazalap, meni súırep alyp shyqty. Sol kezde sińlimniń ústindegi kıiminiń bir shetin kórip qaldym. Ol kirpishtiń astynda qalyp qoıypty jáne daýysy estiler-estilmes shyǵyp jatty. Meni dúkenge kirgizip, kireberistegi sórege otyrǵyzdy. Men olarǵa kirpishtiń astynda sińlim jatqanyn, tez arada kirpishten arshýyn ótindim. Olar jedel kómek berdi. Beri qaraı shyǵarmaqshy edi, dúkendegi bir áıel «tıispeńizder» dep aıqaılady. Sómkemnen telefondy alyp, inim Jangeldige habarlasyp, osyndaı jaǵdaıǵa ushyraǵanymyzdy aıttym. Ol áıeli ekeýi júgirip keldi. Artynan jedel járdem qyzmetiniń eki feldsher qyzy keldi. Sińilim sol ornynda áli jatyr. Qasyna inim jáne ana eki feldsher qyz bardy. Kóp uzamaı kirpishter taǵy da qulady, — dedi ol.
Sonymen qatar bir feldsher qyz basyn ustap, áreń júrip, dúkenge qaraı jaqyndap, «Uldana ana jaqta, kondıtsıoner» dep aıtqanyn jetkizdi.
— Sodan soń, jedel járdem qyzmeti zembilmen birinshi Uldanany, ekinshi inimdi, úshinshi sińilimdi alyp ketti. Bizdi Qoshqarbaev kóshesindegi kópsalaly № 1 aýrýhanaǵa alyp bardy, — dedi jábirlenýshi.
Ol óziniń basy jarylyp, mıy shaıqalǵanyn, sondaı-aq, birneshe qabyrǵasy, omyrtqa súıegi, sol jaq bilek súıegi synǵanyn atap ótti.
12 qarashada Gúlnár Qalıevanyń qolyna ota jasalǵan. Operatsııadan soń, ol óte álsiz bolyp, óz betimen júrip-tura almaǵan.
— 19 qarashada bólim meńgerýshisi meniń aýrýhanadan shyǵatynymdy aıtty. Men shoshyp kettim ári áli álsiz edim. Ol kisige basqa bólimge nemese reabılıtatsııalyq ortalyqqa jatqyzýyn surap jalyndym. Biraq qulaq aspady. Shyǵaryp jiberdi. Balam men inimniń uly kelip, aýrýhanadan alyp ketti. Men úıde uzaq ýaqyt tósekke tańýly boldym. Tamaq pisirýge jáne úı jınaýǵa kórshilerim kelip, kómektesip turatyn, — dedi ol.
Odan bólek, oryn alǵan jaǵdaılarǵa baılanysty úı kezeginde qıyndyqtarǵa tap bolǵanyn aıtty.
— Men 2012 jyldan beri Qostanaı qalasynda úı kezeginde turǵanmyn. Osy oqıǵadan keıin úı kezegim keldi, biraq tabys kózin rastaı almaǵandyqtan, kezegim kelse de, úı ala almaı otyrmyn. Qazir zeınetker retinde de bermeı jatyr. Al sińilim ekeýmiz jumysqa jaramsyz bolyp qaldyq. Tipti, shúberekti de syǵa almaımyn. Qolymda metall konstrýktsııa tur. Bir otbasynan úsh adam jaraqat alyp otyrmyz. Bizdiń alǵan jaraqatymyzǵa kim jaýapty? Moraldyq, psıhologııalyq, fızıkalyq jaraqat alyp otyrmyz. Biz eskerýsiz qalmaýymyz kerek. Ádildik talap etemin, — dedi Gúlnár Qalıeva.
Aıta keteıik, buǵan deıin Uldana Myrzýannyń qazasyna qatysty sotta sottalýshynyń advokaty ǵımarattyń opyrylý sebepterin ataǵanyn jazǵanbyz.
