«Uldana etbetimen jatty»: marqum feldsherdiń áriptesi sotta turǵyn úı qasbetiniń opyrylǵan sáti jóninde aıtyp berdi

Baızaqovanyń aıtýynsha, 8 qarasha onyń demalystan keıingi alǵashqy jumys kúni bolǵan. Uldana Myrzýan 72-brıgadanyń aǵa feldsheri bolsa, al Baızaqova onyń kómekshisi qyzmetin atqarǵan.

— Saǵat 8:30–da alǵashqy shaqyrtý tústi. Ony oryndap, tańǵy as ishý úshin qosalqy stantsııaǵa qaıttyq. Sodan keıin Uldana birinshi dárejeli shaqyrtý túskenin aıtty. Shaqyrtý sebebi jóninde «qabyrǵa opyryldy» degen habar aldyq. Biz birden jolǵa shyqtyq, — dedi kýáger.

Oqıǵa ornyna olar shamamen 7-8 mınýtta jetken. Kóshedegi adamdar medıtsına qyzmetkerlerine naqty qaı jerge barý kerektigin kórsetken. Dúken mańyndaǵy tar ótkelde eki zardap shekken adam Aınur Nurpeıisova men Jangeldi Qalıev jatqan. Al aýyr jaraqat alǵanmen, esin bilgen Gúlnár Qalıeva jýyq jerdegi dúken ishinde otyrǵan.

— Bastapqyda ne qulaǵanyn túsinbedik, áıteýir, kirpishter jatty. Áıel adamdy kóterip, ishke kirgizgimiz keldi. Sol sátte, endi ǵana kótereıin dep jatqanymyzda, ústimizge birdeńe qulady. Aýyrǵanynan onyń kirpish ekenin túsindim, — dedi feldsher.

Aýyr soqqydan keıin, Baızaqova qulap qalǵan. Ornynan turǵan soń, ol Uldanany kórgen.

— Men qulap qaldym. Bári óte bulyńǵyr edi. Ornymnan turyp, Uldanaǵa qarasam, ol etpetimen jatyr eken. Ony kóterdim… Denesiniń saý jeri qalmaǵandaı kórindi, qulaǵy men murnynan qan atqylap jatty, — dedi ol kóz jasyna erik berip.

Kýágerdiń aıtýynsha, Uldana Myrzýan es-tússiz bolǵan. Kóp uzamaı ekinshi jedel járdem brıgadasy kelip, ony alyp ketken. Baızaqova oqıǵa ornynda basqa zardap shekkendermen qalyp, qosymsha brıgadalardy shaqyrǵan.

— Men jalǵyz qaldym. Aǵa dárigerge telefon shalyp, Uldanany alyp ketkenin, ózimniń jalǵyz qalǵanymdy jáne munda úsh zardap shekken adam bar ekenin aıtyp, brıgadalar jiberýdi suradym. Uldanany alyp ketkennen keıin, birden TJM qyzmetkerleri keldi, — dedi ol.

Qutqarýshylar úıindi astynda qalǵan adamdardy shyǵaryp alýǵa kirisken. Keıin Baızaqova talyp qalyp, aýrýhanada esin jıǵan.

Feldsherdiń ózi jabyq bas-mı jaraqatyn alǵan, mıy shaıqalǵan jáne oǵan amnezııa dıagnozy qoıylǵan. Densaýlyǵyna ortasha aýyr deńgeıdegi zııan keldi dep baǵa berilgen.

Jábirlenýshiler ókiliniń suraqtaryna jaýap bere otyryp, ol úıindi astynda qalǵan áıeldiń jaǵdaıyn da aıtty.

— Nurpeıisovanyń jaǵdaıy aýyr boldy. Ol esin bilip jatty, biraq qozǵala almady. Er adam da qozǵala almady, — dedi Baızaqova.

Sotta medıtsına qyzmetkerleriniń qutqarýshylar kelgenge deıin qaýipti aımaqqa nelikten kirgeni de talqylandy. Feldsherdiń aıtýynsha, qasbettiń qaıta qulaý qaýpi týraly olardy eshkim eskertpegen.

— Uldana ekeýmiz birge solaı sheshtik. Dúkendegi adamdar: «Kómektesińder, ne qarap tursyńdar?!» dep aıqaılady. Qasbettiń qulaý qaýpi týraly bizge eshkim eskertken joq, — dedi ol.

Qorǵaýshynyń sol sátte qaýipsizdik tehnıkasy talaptary saqtaldy ma degen suraǵyna kýáger: «Sol kezde — joq», — dep jaýap berdi.

Baızaqova, sondaı-aq, opyrylǵan jerdiń qorshaýǵa alynbaǵanyn atap ótti.

Aıta keteıik, buǵan deıin feldsher Uldana Myrzýannyń qazasyna qatysty sot otyrysynda zardap shekkenderdiń biri Jangeldi Qalıev jaýap bergenin jazǵanbyz.