Ularbek Dáleıulynyń «Batý han» tarıhı-derekti romany jaryq kórdi

ASTANA. KAZINFORM — Belgili jazýshy Ularbek Dáleıulynyń «Batý han» tarıhı-derekti romany oqyrmanǵa jol tartty.

Shyǵarma jaqynda Túrkistan qalasynda ótken Túrik elderiniń halyqaralyq kitap jármeńkesinde tanystyryldy.

Avtordyń aıtýynsha, jańa týyndyda Joshy hannan keıin Ulyq Ulys taǵyna otyrǵan Batý hannyń jastyq shaǵy, Shyńǵys qaǵannan bata alǵan kezi, alǵashqy joryqtary kórkem tilmen beınelenedi. Shúrshitke jasalǵan joryqtar, Batysqa baǵyttalǵan áıgili saıahattar men Ortalyq Eýropaǵa deıingi keń aımaqty baǵyndyrý kezeńderi derekti negizde órbitiledi.

— Batý hannyń áke taǵyna otyrǵan sátinen ómiriniń sońyna deıingi asa aýqymdy oqıǵalardy bir tomǵa syıdyrý múmkin bolmady. Sondyqtan Shaıo shaıqasynan keıingi Edilge qaıtqanǵa deıingi kezeń osy kitapqa arqaý boldy. Romanda dala zańyna súıengen memlekettik basqarý júıesiniń ornyǵýy, ulystyń mádenıeti men órkenıetiniń qalyptasýy, hanzadalar men noıandardyń, jaýynger jasaqtardyń erligi keńinen sýretteledi, — deıdi Ularbek Dáleıuly.

Ol, sonymen birge, aldaǵy ýaqytta osy jelimen tarıhı romandar serııasyn jazýdy jalǵastyratynyn aıtty.

— Joshy han negizin qalaǵan, Batý han irgesin keńeıtken Altyn Orda dáýirindegi dańqty handar týraly tarıhı romandar serııasyn jazýdy josparlaǵanmyn. Qazir sol oıǵa alǵan armanymdy júzege asyrý jolynda alǵa jyljyp kelemin, — deıdi avtor.

Aıta keteıik, buǵan deıin avtor kazinform tilshisine «Batý han» romanyn jazyp jatqany týraly aıtqan edi.