Ulandyqtar qańtar oqıǵasy kezinde kómek kórsetken medıtsına qyzmetkerlerine alǵys aıtty

ALMATY. QazAqparat - 1 naýryz - Qazaqstanda Alǵys aıtý kúni. Osy dataǵa oraı Ulttyq ulan sarbazdary qańtardaǵy jappaı tártipsizdik kezinde kómek kórsetken medıtsına qyzmetkerlerine alǵys bildirdi alǵys bildirdi, dep habarlaıdy QazAqparat tilshisi.

Qańtardaǵy tártipsizdikter kezinde, búlikshiler áskerılerge qarsy kúsh qoldanyp, qoldaryna túsken temir, tas, aǵashpen uryp, kólikpen ádeıilep qaqqan jaǵdaılar da boldy.

Sarbazdardyń qatarynda oq tıip jaralanǵandar da bar. Ulttyq ulannyń eki jaýyngeri jappaı tártipsizdik kezinde erlikpen qaza tapty.
Sol kúnderi el ishinde sarbazdardy qorǵap, arasha túsken azamattar boldy.
Jaralanǵan jaýyngerlerge medıtsınalyq kómek kórsetip, qoldan kelgenshe qoldaý bildirgen osyndaı azamattarǵa Ulttyq ulan sarbazdary alǵys bildirdi.
«Kerýen-Medicus» medıtsına ortalyǵynyń dırektory, dáriger Zınýra Sapabekovanyń aıtýynsha, 5 qańtar kúni ádettegideı jumysqa erte kelgen. Biraq ortalyq qyzmetkerleriniń jartysy sol kúni jumysqa jete almaǵan. Bireýi jol jabyq dese, ekinshisi qoǵamdyq kólikter júrmeı jatqanyn aıtqan.

«Biz jumysqa kelgen azdaǵan qyzmetkerlerimizben kúndelikti isimizge kiristik. Klınıka jumys istep turdy. Biraq kelgen em alýshylardyń sany kóp bolǵan joq. Kúndizgi saǵat ondar shamasynda gúrsildegen daýystar estı bastadyq. Basynda Jańa jyl merekesinen qalǵan feırverkterdi atyp jatqan bolar dep, asa mán bermedik. Ornalasqan jerimiz Tóle bı kóshesine jaqyn edi. Bizge kelgen em alýshylar Tóle bı kóshesiniń boıymen alańdy betke alǵan halyqtyń sany qalyń ekenin aıtyp jatty. Bir saǵattan keıin jańaǵy qalyń top bizdiń medıtsınalyq ortalyqtyń qasynan ótti. Qoldarynda qarý, armatýra, polıtsııanyń qalqany men kaskasy bar, kimniń-kim ekeni belgisiz adamdar ótip jatty. Bul kórinis óte qorqynyshty edi. Biz bul jerde eshkim joq dep oılasyn degen eseppen, klınıkanyń jaryqtaryn óshirip, esikterin jaba bastadyq»,-deıdi ol.

Emhana qyzmetkerleri kútpegen jerden forma kıgen 5 adamnyń ortalyq qorshaýynyń qaqpasynan sekirip ketkenin baıqap qaldy. Ekeýi ary qaraı ketti, úsheýi ǵımaratqa qyzmettik esik arqyly kirip, emhana dárigerlerinen kómek surap júgindi. Belgili bolǵandaı, olar Ulttyq ulannyń sarbazdary eken.
«Sarbazdar ózderiniń sońynan bir top adam qýyp kele jatqanyn aıtyp, bir jerge jasyrýymyzdy ótindi. Olar jaraqat alǵan. Ortalyǵymyz 4 qabatty, eń joǵary qabatynda ota jasaý bólimi bar. Jańa jyl merekesi qarsańynda em alýshylardyń kóbi úılerine shyǵyp ketkendikten, ol bólim bos bolatyn. Biz sarbazdardy joǵarydaǵy ár kabınetke jasyryp qoıdyq. Artynsha áskerılerdi izdegen 40-50 adam klınıkamyzǵa basa-kóktep kirdi. Osy eki aralyqtaǵy ýaqytty keıin beınebaqylaý kamerasynan qarasaq, 5 mınýtqa da jetpeıdi eken. Qazir sol ýaqytta qalaı jasyryp úlgergenbiz dep oılaımyz»,- dep eske aldy dáriger.
Zınýra Sapabekova kelissóz júrgizip, buzaqylardy jaraly sarbazdarǵa tıispeýge kóndirdi.
« Olardyń qolynda túrli sýyq qarý boldy. Kire sala, kabınetterdiń esikterin syndyryp, áskerılerdi izdeı bastady. Buzaqylar ary-beri júgirip júrip, bir sarbazdy taýyp aldy. Men jaýyngerge arasha túsýge tyrystym. «Bul - jas bala, sarbaz. Ózderińniń de osyndaı baýyrlaryń bar shyǵar. Oǵan tıispeńder», dep qatty-qatty sóıledim. Ózim qatty qorqyp turdym. Meniń sózim áser etti me, ishindegi bireýi «jas bala eken, tıispeńder», dep qalǵandaryn alyp shyǵyp ketti. Olar ketken soń da, qaıtyp kele me dep qaýiptenip, jarty saǵatqa deıin, qozǵalmaı otyrdyq. Sodan keıin ǵana sarbazdardyń qasyna baryp, jaralaryn tańyp, medıtsınalyq kómek kórsete bastadyq. Bireýiniń aıaǵy synǵan eken, bireýiniń basy jarylǵan»,- deıdi Zınýra Sapabekova.

«Kerýen-Medicus» medıtsına ortalyǵy dırektorynyń sózinshe, qıyndyqqa tap bolǵan jastarǵa qoldaý kórsetý kez kelgen adamnyń azamattyq boryshy.
«Bul oqıǵany estigen adamdar úlken erlik jasapsyń dep jatyr. Men bul isimdi erlik dep sanamaımyn. Mundaı jaǵdaıda árbir sanaly azamat osylaı jasar edi. Men sarbazǵa arasha tústim. Sebebi onyń jazyǵy joq. Ol bizdiń tynyshtyǵymyz ben qaýipsizdigimizdi qorǵap, zardap shekti. Qańtardyń qorqynyshty kúnderi esimizde uzaq ýaqyt boıy saqtalatyny sózsiz. Óte qıyn kúnder boldy. Endi mundaı kúnder qaıtalanbasa eken. Elimizde tynyshtyq bolsyn»,- deıdi ol.
Alǵys aıtý kúni Ulttyq ulan sarbazdary emhanaǵa arnaıy baryp, estelik syılyqtaryn tabystap, dárigerlerge sheksiz alǵys aıtty.