Ulandyqtar Semeıde balany jazataıym jaǵdaıdan saqtap qaldy
SEMEI.KAZINFORM - Semeı qalasynda ІІM Ulttyq ulanynyń 5511 áskerı bóliminiń sarbazdary jańa shaǵyn aýdandardyń birinde qoǵamdyq qaýipsizdikti qamtamasyz etý qyzmetin atqarý kezinde qaıǵyly jaǵdaıdyń aldyn aldy.
Áýezov dańǵylyn patrýldeý kezinde áskerı jasaq kópqabatty úılerdiń biriniń úshinshi qabatynda eresekterdiń qaraýynsyz ashyq terezeniń janynda turǵan kishkentaı balany baıqady.
Áskerı jasaq bastyǵy efreıtor Dáýlet Seıdaly qaramaǵyndaǵy patrýlshi efreıtor Beksultan Temirbekov jáne qatardaǵy jaýynger Álı Saǵymbaevpen birge balanyń tereze aldynda oınap, jerge uıaly telefon men kiltter laqtyrǵanyn kóredi.
Bul jaǵdaıdyń qaýiptiligin sezgen áskerı qyzmetshiler qulap ketken jaǵdaıda balany qaǵyp alýǵa úlgerý úshin tereze astyna muqııat ornyǵady.
— Áriptesterimmen qajet bolǵan jaǵdaıda balany ustap alý úshin tereze astynda kúttik. Men úıde eresekter bar-joǵyn bilý úshin ishke kirdim. Dereý oqıǵa ornyna polıtseılerdi shaqyrdyq. Kóp uzamaı jumystan balanyń ákesi keldi, - deıdi efreıtor Dáýlet Seıdaly.
Kórsetken erligi úshin áskerı jasaq bastyǵy efreıtor Dáýlet Seıdaly, sondaı-aq patrýldeýshiler efreıtor Beksultan Temirbekov pen qatardaǵy Alı Saǵymbaev Abaı oblysy Tótenshe jaǵdaılar departamentiniń alǵys hatymen marapattaldy. Sonymen qatar efreıtor Dáýlet Seıdaly «Qoǵamdyq tártipti saqtaǵany úshin» tósbelgisimen «Shyǵys» óńirlik qolbasshylyǵy qolbasshysynyń atynan kótermelendi.
Efreıtor Beksultan Temirbekov pen qatardaǵy Alı Saǵymbaev áskerı bólim komandıriniń sheshimimen 10 táýlik merzimge qysqa merzimdi demalysqa jiberildi. Sondaı-aq áskerı qyzmetshilerge qol saǵattar tabystaldy.
Bul oqıǵa Ulttyq ulan áskerı qyzmetshileriniń tótenshe jaǵdaılarda áreket etýge joǵary daıyndyǵyn, sondaı-aq azamattardyń ómiri men qaýipsizdigin qorǵaýǵa bar kúshin salatynyn aıqyn kórsetedi.
- Biz jyldam áreket ettik, sebebi ár sekýnd mańyzdy ekenin túsindik. Eń bastysy, qaıǵyly jaǵdaıǵa jol bermeý boldy. Bizdiń qyzmetimizge osyndaı joǵary baǵa berilgeni men úshin úlken mártebe ári maqtanysh, - dedi efreıtor Beksultan Temirbekov.
Aıta ketý kerek, bul áskerı bólimniń áskerı qyzmetshileri buǵan deıin de azamattarǵa kómek kórsetken: olar kóshede aýyryp qalǵan adamǵa jedel medıtsınalyq kómek kórsetip, onyń ómirin saqtaýǵa sebepshi bola bildi.
