Ulandyqtar Golovkındi Halyqaralyq boks dańqy zalyna esimi jazylýymen erekshe quttyqtady
ASTANA. KAZINFORM — QR ІІM Ulttyq ulanynyń áskerı qyzmetshileri otandyq sport ańyzy Gennadıı Golovkınniń tarıhı jetistigine oraı patrıottyq aktsııa uıymdastyrdy.
Ulttyq ulannyń baspasóz qyzmetiniń málimetinshe, ataqty boksshynyń sporttaǵy eren eńbegi men el abyroıyn asqaqtatqan jetistikterine qurmet retinde ulandyqtar saptyq alańda chempıonnyń álemge tanymal sporttyq brendine aınalǵan «GGG» jazýyn beıneledi.
Aktsııa Gennadıı Golovkınniń AQSh-tyń Nıý-Iork shtatyndaǵy Kanastota qalasynda ornalasqan Halyqaralyq boks dańqy zalyna (IBHOF) qabyldanýyna oraı uıymdastyryldy. Ol osyndaı joǵary mártebege ıe bolǵan elimizdiń tuńǵysh ókili atandy.
Іs-sharanyń erekshe rýhyn Úlgili-kórsetimdi orkestrdiń óneri aıshyqtaı tústi. Áskerı mýzykanttar Gennadıı Golovkın jekpe-jekter aldynda dástúrli túrde rıngke shyǵatyn áıgili Seven Nation Army kompozıtsııasyn oryndady. Qurmet qaraýyly rotasynyń áskerı qyzmetshileri joǵary saptyq daıarlyǵy men úılesimdi is-qımyldaryn kórsetip, áserli patrıottyq aktsııanyń basty qatysýshylaryna aınaldy.
— Gennadıı Golovkın óziniń qajyrly eńbegi, sheberligi men jarqyn jeńisteri arqyly Qazaqstannyń atyn álemge tanytty. Onyń sporttyq jetistikteri ulttyq maqtanysh aınalǵan. Ol jas urpaqqa tabandylyq pen óz isine adaldyqtyń arqasynda álemdik deńgeıdegi jetistikke jetýge bolatynyn dáleldegen jarqyn tulǵa, — dedi aktsııaǵa qatysýshy qatardaǵy Marlen Suramaev.
Gennadıı Golovkın kásibı bokstaǵy eń joǵary qurmetterdiń biri sanalatyn Halyqaralyq boks dańqy zalyna alǵashqy múmkindikten-aq qabyldandy. Endi onyń esimi Muhammed Álı, Maık Taıson, Floıd Meıvezer jáne Mennı Pakıao sekildi ańyz sportshylarmen bir qatarda tur. Gennadıı Golovkın sporttyq mansabynda áýesqoı jáne kásibı rıngte de joǵary nátıjelerge qol jetkizdi. Áýesqoı boksta ol 350 jekpe-jektiń 345-inde jeńiske jetip, uzaq jyldar boıy ulttyq quramanyń kóshbasshylarynyń biri boldy. Sondaı-aq elimizdiń namysyn eń bedeldi halyqaralyq jarystarda abyroımen qorǵady.
Ulttyq ulan áskerı qyzmetshileriniń bul patrıottyq aktsııasy otandyq sport sańlaqtarynyń jetistikterine degen qurmet pen Qazaqstannyń halyqaralyq arenadaǵy bedelin nyǵaıtýǵa qosqan úlesin joǵary baǵalaýdyń aıqyn kórinisi boldy.
Aıta keteıik, Golovkındi Dańq zalyna qabyldaý aldynda amerıkalyq jankúıerler erekshe qurmetpen qarsy alǵany belgili boldy.
Budan buryn Memleket basshysy Qasym-Jomart Toqaev Gennadıı Golovkınniń esimi Halyqaralyq boks dańqy zalyna resmı túrde jazylýymen quttyqtaǵanyn jazǵanbyz.
