Ulandyq sarbazdar ashana taǵamyn elektrondy júıe arqyly baǵalaıdy
ASTANA. KAZINFORM — Apparattyq-baǵdarlamalyq keshen qazirgi ýaqytta pılottyq rejımde Ulttyq ulannyń 5573 áskerı bóliminde iske qosylǵan, dep habarlaıdy QR ІІM Ulttyq ulanynyń baspasóz qyzmeti.
Ulttyq ulanda sarbazdardy sapaly tamaqtandyrý júıesin jetildirý máselesine arnalǵan dóńgelek ústel ótti. Jıynda Prezıdent Qasym-Jomart Toqaevtyń tsıfrlandyrý jónindegi tapsyrmalaryn oryndaý aıasynda quqyqtyq tártip áskerinde qolǵa alynǵan jańa pılottyq joba tanystyryldy.
Bul joba sarbazdardyń kúndelikti tamaqtaný sapasyn arttyrýǵa, azyq-túlik qaýipsizdigin kúsheıtýge, ashana jumysynyń ashyqtyǵyn qamtamasyz etýge jáne adam faktorynan týyndaıtyn táýekelderdi azaıtýǵa baǵyttalǵan.
Dóńgelek ústelge arnaıy qatysqan QR Іshki ister mınıstriniń orynbasary — Ulttyq ulannyń Bas qolbasshysy Ańsaǵan Baltabekov áskerı qyzmetshilerdi sapaly tamaqtandyrý Ulttyq ulan qyzmetiniń mańyzdy baǵyttarynyń biri ekenin atap ótti. Ol jıyn barysynda áskerdegi azyq-túlikpen qamtý jaǵdaıy, ashanalardy tekserý nátıjeleri jáne ózekti máseleler talqylanatynyn aıtty.
Apparattyq-baǵdarlamalyq keshen qazirgi ýaqytta pılottyq rejımde Ulttyq ulannyń 5573 áskerı bóliminde iske qosylǵan. Jobanyń basty ereksheligi — sarbazdarǵa ashanadaǵy taǵam sapasyn elektrondy júıe arqyly jedel baǵalaýǵa múmkindik berýi. Arnaıy panel arqyly berilgen baǵalar birden azyq-túlik jetkizýshi men basshylyqqa usynylady.
Bıylǵy tamyz aıyna deıin júıeniń tıimdiligi saralanyp, onyń nátıjesine qaraı ózge bólimderge engizý múmkindigi qarastyrylmaq.
— Bul júıe bizge óz pikirimizdi erkin aıtýǵa múmkindik beredi. Qandaı taǵam unady, qaısysy unamady — bárin birden baǵalaı alamyz. Sonyń arqasynda ashanadaǵy tamaq sapasy da jaqsaryp keledi, — dedi 5573 áskerı bóliminiń sarbazy kishi serjant Nuraly Jazıt.
Jıynda sondaı-aq azyq-túlik qaýipsizdigin saqtaý, sanıtarlyq talaptardy kúsheıtý, azyq-túlik jetkizýshiler jumysynyń ashyqtyǵyn qamtamasyz etý jáne bıýdjet qarajatyn tıimdi paıdalaný máseleleri qaraldy.
Aıta keteıik, búginde 7 myńnan astam ulandyq elimizdiń 21 qalasynda qoǵamdyq tártipti kúzetedi. Sondaı-aq 2 myńnan asa sarbaz memlekettik mańyzy bar nysandar men QAJ mekemeleriniń qaýipsizdigin qamtamasyz etip júr.
Osydan buryn Ulttyq ulan sarbazy 100-ge jýyq kúıdi jatqa biletinin jazǵanbyz.
