Ulandyq pankratıonnan Azııanyń úsh dúrkin chempıony atandy
ASTANA. KAZINFORM – QR ІІM Ulttyq ulanynyń «Burkit Team» sport komandasynyń múshesi Abylaı Shákirbekov Vetnamnyń Danang qalasynda ótken pankratıonnan Azııa chempıonatynda altyn medal jeńip aldy.
Ulandyq sportshy 93 kelige deıingi salmaq dárejesinde sátti óner kórsetip, birinshiliktiń jeńimpazy atandy. Osylaısha Abylaı Shákirbekov pankratıonnan úshinshi ret Azııa chempıony ataǵyn jeńip alyp, óz sheberliginiń joǵary deńgeıin jáne atalǵan jekpe-jek túrindegi kóshbasshylyq ornyn taǵy bir márte dáleldedi.
Sátti jarystan keıin sportshy elge oralyp, Astana halyqaralyq áýejaıynda ony Ulttyq ulan Bas qolbasshylyǵynyń ókilderi, jattyqtyrýshylary, sondaı-aq týǵan-týystary men jaqyndary saltanatty túrde qarsy aldy.
Abylaı Shákirbekovtiń jeńisi «Burkit Team» sport komandasy úshin mańyzdy jetistik boldy. Onyń halyqaralyq arenadaǵy tabysty óner kórsetýi – tabandylyqtyń, qaısarlyqtyń jáne sportqa degen adaldyqtyń jarqyn úlgisi.
Aıta ketý kerek, ulandyqtardyń halyqaralyq jarystardaǵy joǵary nátıjeleri elimizdiń sporttyq bedelin nyǵaıtýǵa yqpal etip, jas urpaqqa ónege bolýda.
