Ulandyq kýrsanttar Petropavl qalasynyń aýyz sýǵa arnalǵan stantsııasyn qorǵap qaldy
ASTANA. KAZINFORM – Qazaqstan Ulttyq ulany akademııasynyń 400 kýrsanty sý tasqynyna baılanysty Petropavl qalasynyń aýmaǵyndaǵy mańyzdy nysandardy sýdan qorǵaý jumystaryna jumyldyryldy.
Bıylǵy 20 naýryzdan bastap búgingi kúnge deıin akademııanyń kýrsanttary SQO-nyń Prıbrejnyı, Kojevennyı, Olshanka, Zarechnyı, Beskól eldi mekenderinde, sondaı-aq Petropavl qalasynyń shetki aımaqtaryndaǵy Solnechnyı, Bereke, Podgara, Rabochıı shaǵyn aýdandarynda sý tasqynyn boldyrmaý jáne apattyń saldaryn joıý jumystaryn atqaryp jatyr.
«Kýrsanttar sý tasqynyn toqtatý maqsatynda qaptardy topyraq pen qumǵa toltyryp, bógetterdi kúsheıtý jumystaryna atsalysyp keledi. Olar Solnechnyı, Bereke, Rabochıı shaǵyn aýdandarynda aryqtardy tazalap, tasqyn sýdyń aldyn alý jumystaryn qolǵa alyp, Beskól kentinde sýdyń kóterilýin ýaqytyly anyqtaý maqsatynda qadaǵalaý pýnktterin qoıyp, qyzmet atqardy. Sondaı-aq akademııanyń 400 áskerı qyzmetshisi jáne 19 tehnıkasy Petropavl qalasynyń eldi mekenderindegi (Olshanka aýyly, Beskól k., Gorvodokanal, Pestryı kóli, Leshoz) sý tasqynyna qarsy jumystardy atqarýǵa belsendi qatysyp jatyr», - dedi Ulttyq ulan Akademııasynyń bastyǵy polkovnık Artýr Toqyshev.
Sonymen qatar Ulttyq ulan kýrsanttary, sarbazdary men Qorǵanys mınıstrliginiń jaýyngerleri Petropavl qalasynyń «Qyzyljar sý» JShS-niń aýyz sýǵa arnalǵan sorǵy stantsııasyn tasqyn qaýpinen qorǵaý úshin tosqaýyl qoıý is-sharalaryna tartylyp, túni boıy kirpik ilmesten tynymsyz jumys atqardy. Qoldanylǵan tıisti sharalar men kýrsanttardyń janqııarlyq eńbeginiń nátıjesinde qala turǵyndaryn aýyz sýmen qamtamasyz etý qurylǵylary iske qosyldy.
