Ulanbatyr men Almaty arasynda jańa áýe reısi ashyldy

ULANBATYR. QazAqparat – Almaty qalasynan Mońǵolııa astanasyna tikeleı áýe reısi ashyldy, dep habarlaıdy QazAqparat.

Búgin Qazaqstannyń Mońǵolııadaǵy Elshisi Jalǵas Ádilbaev Mońǵolııa Úkimetiniń Atqarýshy agenttigi – Azamattyq avıatsııa bas basqarmasy jáne «Hýnný eır» áýe kompanııasynyń basshylyǵymen birge atalǵan kompanııanyń «Ulanbatyr – Almaty – Ulanbatyr» baǵytyndaǵy áýe qatynasyn ashýǵa arnalǵan baspasóz konferentsııasyna qatysty.

Elshi óz sózinde Qazaqstannyń eń iri megapolısi men Mońǵolııanyń astanasy arasyndaǵy tikeleı áýe qatynasynyń ashylýymen quttyqtap, 2019 jylǵy 10 qazanda Nur-Sultanda ótken QR Premer-Mınıstri Asqar Mamın men Mońǵolııa Premer-mınıstri Ýhnaagıın Hýrelsýhtyń arasyndaǵy kelissózder barysynda qol jetkizilgen osy baǵyt boıynsha áýe qatynasyn ashý jónindegi ýaǵdalastyqtyń tolyq oryndalǵanyn atap ótti.

Atalǵan jańa áýe baǵyty ekijaqty saıası, saýda-ekonomıkalyq, mádenı-gýmanıtarlyq jáne týrıstik salalardaǵy baılanystardyń qarqyndy damýyna múmkindik beretini aıtyldy.

Búgin «Hýnný eır» áýe kompanııasynyń ushaǵy «Ulanbatyr – Almaty – Ulanbatyr» baǵyty boıynsha alǵashqy repatrıatsııalyq reısti oryndady. Covid-19 saldarynan týyndaǵan álemdegi epıdemıologııalyq jaǵdaı jaqsarǵannan keıin ushýdyń naqty jıiligi belgilenedi.