Ulan-Batyrdaǵy týrnır: Qazaqstan qorjyny úsh qola medalmen tolyqty
ASTANA. KAZINFORM – Kúres túrlerinen Mońǵolııanyń Ulan-Batyr qalasynda ótip jatqan reıtıngtik týrnırdiń kezekti jarys kúninde Qazaqstan quramasy úsh medal jeńip aldy.
Úsh júldeniń barlyǵy – qola medal.
Grek-rım kúresinen 63 kelige deıingi salmaqta óner kórsetken Erkebulan Ardaqov qola medal úshin ótken beldesýde ońtústikkoreıalyq Henýn Chhveden basym tústi.
130 kelige deıingi salmaqta Oljas Syrlybaı úndistandyq Djogınder Rathıdi senimdi jeńip, jarysty úshinshi orynmen aıaqtady.
Al áıelder kúresinde 57 kelige deıingi salmaqta Nılýfar Raımova sıngapýrlyq Danıel Sıý Chıng Lımdi jeńip, qola júldege qol jetkizdi.
Ókinishke qaraı, 50 kelige deıingi salmaqta Maral Táńirbergenova qola medal úshin ótken beldesýde jeńilip qaldy.
Sondaı-aq 72 kelige deıingi salmaqtaǵy Jámıla Baqbergenova jarysty merziminen buryn aıaqtady. Ol qola júlde úshin kúresýi tıis bolǵan. Alaıda federatsııanyń baspasóz qyzmetiniń málimetinshe, qazaqstandyq balýan jaraqat alyp, jarystan shyǵyp qaldy.
Aıta keteıik, buǵan deıin grek-rım kúresiniń ókili Nurasyl Amanaly (97 kelige deıin) kúmis júldeger atanǵan edi.
