Ulan-Batyrda sherýge shyqqan halyq ortalyq alańdy jaýyp tastaǵan
ASTANA. KAZINFORM — Demonstranttar Mońǵolııa Úkimetiniń otstavkaǵa ketýin talap etetin plakattar ustap shyqqan, dep habarlaıdy Montsame aqparat agenttigi.
2025 jyldyń 11 qańtarynda Mońǵolııa astanasynyń ortalyq alańynda júzdegen adam qatysqan beıbit demonstratsııa ótti. Quqyq qorǵaý organdary azamattardy beıbit jolmen óz kózqarastaryn bildirýge shaqyrdy.
TASS málimetinshe, Ulan-Batyrdyń basty alańynda tústen keıin bastalǵan beıbit mıtıngke jınalǵan adamnyń sany keshke qaraı 1 myńnan asqan.
Demonstranttar Úkimettiń otstavkaǵa ketýin talap etetin plakattar ustap shyqqan. Olar el Úkimetiniń kólik keptelisi, kedeılik, sybaılas jemqorlyq, joǵary salyq jáne jumyssyzdyq máselelerin tıimdi sheshe almaıtyndyǵyna alańdaýshylyq bildirdi. Olardyń pikirinshe, bul máseleler qarapaıym azamattardyń, ásirese jumysshylardyń moınyna aýyr salmaq túsiredi.
Demonstratsııany uıymdastyrýshylar — «Bostandyq koalıtsııasy» partııasy atalǵan aktsııa 22 qańtarǵa deıin jalǵasady dep málimdedi. Budan bólek, partııa Uly Memlekettik Hýraldyń 33 múshesine resmı hat joldaǵan kórinedi. Onda úkimettiń otstavkaǵa ketýi týraly máseleni daýys berýge shyǵarýdy talap etti.
Demonstratsııa kezinde qatysýshylar ortalyq alańnyń aldyndaǵy jol qıylysyn ýaqytsha jaýyp tastady. Saldarynan jedel járdem men shuǵyl qyzmetterdiń ótýine qıyndyq týǵyzdy. Osyǵan baılanysty polıtsııa demonstratsııany ótkizýge saǵat 11:00–den 17:00–ge deıin ruqsat berilgenin eske salyp, qatysýshylardy qoǵamdyq tártipti buzbaýǵa, erejelerdi saqtaýǵa shaqyrdy.
Eske salsaq, osyǵan deıin byltyr 92,4 myńnan astam sheteldik Mońǵolııanyń elektrondy vızasyn alǵanyn jazdyq.